केंद्र सरकारच्या चालू वित्तीय वर्षातील स्वच्छता सर्वेक्षणात मध्य प्रदेशच्या इंदूरने पहिल्या आणि दुसऱ्या तिमाहीमध्ये देशातील सर्वांत स्वच्छ शहराचा मान पुन्हा पटकावला. इंदूरला यापूर्वी सलग तीन वर्षे देशातील सर्वांत स्वच्छ शहर होण्याचा मान मिळाला आहे.
केंद्रीय नगरविकासमंत्री हरदीपसिंग पुरी यांनी मंगळवारी निर्माणभवन येथे स्वच्छ सर्वेक्षणाच्या पहिल्या दोन तिमाहींचे निकाल जाहीर केले. १० लाखांपेक्षा जास्त लोकसंख्येच्या शहरांमध्ये २०१९-२० या वर्षात एप्रिल ते जून आणि जुलै ते सप्टेंबर या पहिल्या दोन तिमाहींमध्ये झालेल्या स्वच्छता सर्वेक्षणात इंदूरने आपले वर्चस्व कायम राखले आहे. पहिल्या तिमाहीच्या सर्वेक्षणात दुसऱ्या क्रमांकावर असलेल्या भोपाळची दुसऱ्या तिमाहीत पाचव्या क्रमांकावर घसरण झाली आहे. पहिल्या तिमाहीत पाचव्या क्रमांकावरील राजकोटने दुसऱ्या स्थानावर झेप घेतली आहे.
स्वच्छता सर्वेक्षण २०१८मध्ये इंदूरपाठोपाठ भोपाळ दुसऱ्या, तर चंडीगड तिसऱ्या क्रमांकावर होते. मागच्या वर्षी राज्य म्हणून स्वच्छतेच्या बाबतीत अव्वल क्रमांकावर झारखंडने बाजी मारली होती. महाराष्ट्र दुसऱ्या, तर छत्तीसगड तिसऱ्या क्रमांकावर होते.
एकूण सहा हजार गुण असलेले स्वच्छ सर्वेक्षण २०२० एप्रिल ते जून, जुलै ते सप्टेंबर आणि ऑक्टोबर ते डिसेंबर अशा तीन तिमाहींमध्ये राबविले गेले असून, येत्या ४ ते ३१ जानेवारीदरम्यान वार्षिक सर्वेक्षणाला सुरुवात होणार आहे.
स्वच्छ शहरांमध्ये पुणे बाराव्या स्थानावर असून, पिंपरी-चिंचवड चौदाव्या स्थानावर आहे. पहिल्या टप्प्यातही पुणे बाराव्या क्रमांकावर होते. आता तिसऱ्या आणि अंतिम टप्प्याचे सर्वेक्षण सुरू असून, त्यासाठी महापालिकेतर्फे जोरदार तयारी सुरू आहे. या टप्प्यात पालिकेची कामगिरी सुधारली; तर यंदा पहिल्या दहा क्रमांकात स्थान मिळविण्याची अपेक्षा पूर्ण होणार आहे.