एन चार परिसरातील निवृत्त सर्जनचा बंगला फोडण्यापूर्वी चोरट्यांनी त्याच परिसरातील एका बंगल्याला लक्ष्य केले होते. मात्र, त्या ठिकाणी उजेड असल्याने त्यांनी काढता पाय घेतला. या चोरीमागे दोन पुरूष आणि एका महिलेचा सहभाग असून, त्यांचा युद्धपातळीवर शोध सुरू आहे.
तिरुपती पार्क येथील डॉ. नामदेव कलवले यांचा बंगला फोडून चोरट्यांनी ७७ तोळ्याच्या दागिन्यांसह पावणेपाच लाखांची रोकड पळवली. २८ डिसेंबर ते ३० डिसेंबरच्या दरम्यान हा प्रकार घडला. यावेळी कलवले कुटुंब मुंबईला गेले होते. चोरट्यांनी मुख्य दरवाजाचे ग्रील काढत घरात प्रवेश केला होता. या प्रकरणी पुंडलिकनगर पोलिस ठाण्यात गुन्हा दाखल करण्यात आला आहे. या घटनेमुळे पोलिस दल खडबडून जागे झाले. परिसरातील सीसीटीव्ही कॅमेऱ्याचे फुटेज पोलिसांनी तपासणे सुरू केले आहे. कलवले यांचे घर फोडण्यापूर्वी चोरट्यांनी त्याच परिसरातील कलवले यांच्या बंगल्यापासून सुमारे तीनशे मीटर अंतरावर असलेल्या एका बंगल्याला लक्ष्य केले. या बंगल्याच्या कंपाउंडमध्ये चोरट्यानी उडी मारल्याचे सीसीटीव्ही फुटेजमध्ये चित्रित झाले आहे. मात्र, या बंगल्यातील लोकांना चाहूल लागली असावी किंवा तेथे उजेड जास्त असल्याने चोरट्यांनी तेथून काढता पाय घेतला. यानंतर त्यांनी कलवले यांच्या बंगल्याकडे मोर्चा वळवला. पोलिसांनी तपासलेल्या सीसीटीव्हीमध्ये दोन पुरूष आणि एक महिला संशयित आरोपी दिसत आहे. या संशयितांचा शोध सुरू असल्याची माहिती सूत्रांनी दिली.
शहरातील रेकॉर्डवरील गुन्हेगारांची देखील याप्रकरणी चौकशी सुरू आहे. …गुन्ह्यात पेालिसांना मिळालेल्या माहितीनुसार सराईत गुन्हेगाराचा समावेश आहे. या संशयिताचा शोध पुंडलिकनगर पोलिसांनी घेतला असता तो पसार झाल्याचे दिसून आले. या गुन्हेगाराला अटक केल्यानंतर हा गुन्हा उघडकीस येण्याची शक्यता पोलिसांनी व्यक्त केली.