छुप्या मार्गाने ड्रग्ज आणून त्यांची मुंबईत विक्री करणारे अनेक रॅकेट आणि तस्कर याआधी पोलिसांच्या कारवायात पकडले गेले. मात्र गुन्हे शाखेने शनिवारी अटक केलेल्या तरुणाच्या चौकशीतून एक नवीनच प्रकार उघडकीस आला आहे. या ड्रग्ज तस्कराने घरातच गांजाची शेती केली आहे. हायड्रोपोनिक ग्रो सिस्टीमचा वापर करून कुंड्यामध्ये गांजाची लागवड करणाऱ्या या तरुणाकडून पोलिसांनी गांजा आणि एमडी ड्रग्ज हस्तगत केले.
मुंबईत ठिकठिकाणी पुरविण्यात येणारा अंमली पदार्थाचा साठा येतो कुठून याबाबत पोलिस नियमित शोध घेत असतात. अशाच पुरवठादारांचा शोध घेत असताना चेंबूर, आरसीएफ, देवनार परिसरातून गांजा तसेच इतर ड्रग्ज पुरविले जात असल्याची माहिती गुन्हे शाखा युनिट ३ चे पोलिस निरीक्षक नितीन पाटील यांना मिळाली. या माहितीच्या आधारे प्रभारी पोलिस निरीक्षक अशोक खोत यांच्या मार्गदर्शनाखाली पोलिसांच्या पथकाने माहुल गाव येथील बीपीसीएल कंपनीसमोरून निखिल शर्मा (२६) या तरुणाला ताब्यात घेतले. अंगझडतीमध्ये त्याच्याकडील बॅगमध्ये एक किलो गांजा आणि ५४ ग्रॅम एमडी असा सुमारे २ दोन ९० हजारांचा साठा सापडला. हा गांजा आणला कुठून याबाबत अधिक चौकशी करण्यासाठी पोलिसांनी त्याला ताब्यात घेतले. कसून चौकशीमध्ये हा गांजा मित्राच्याच घरी पिकवण्यात आल्याची धक्कादायक माहिती निखिल याने दिली.
पोलिसांनी माहुल गावातील पालव बाग येथील निखिल याच्या मित्राच्या घराची झडती घेतली. निखिलचा मित्र गायब होता. मात्र त्याच्या घरी गांजाची शेतीची हायड्रोपोनिक ग्रो सिस्टीमचा वापर करून केली जात असल्याचे दिसले. गांजा शेती करण्यासाठी लागणारे तीन हायड्रोपोनिक तंबू, एलएडी लाईट्स, गांजाच्या बिया, हायड्रोपोनिक खते, कुंड्या, टायमर यंत्रणा, पीएच सॉइल टेस्टर, आर्द्रता मापक, पेपर टॉवेल असे सुमारे सहा लाखांचे साहित्य पोलिसांनी हस्तगत केले. इंजिनीअरिंगचे शिक्षण पूर्ण करू न शकलेल्या निखिलने इंटरनेटवरून हायड्रोपोनिक ग्रो सिस्टीमची माहिती मिळवली. त्यासाठी लागणारे साहित्यही त्याने ऑनलाइन मागविले. निखिल आणि त्याचा मित्र घरातच गांजाची निर्मिती करून त्याची विक्री करीत होते. हा गांजा उच्च प्रतीचा असून एक ग्रॅमसाठी सुमारे दोन हजार रुपये मोजावे लागत असल्याचे पोलिसांनी सांगितले.