आई-वडिलांच्या निष्काळजीपणामुळे कारमध्ये अकडलेल्या चिमुकलीची एका दक्ष शिक्षकाच्या तत्परतेमुळे सुखरूप सुटका झाली. नगरच्या प्रेमदान चौकाजवळ शुक्रवारी दुपारी ही घटना घडली.
यासंबंधी माहिती अशी, येथील राष्ट्रपती पुरस्कारप्राप्त शिक्षक डॉ. अमोल बागूल प्रेमदान चौकातून जात होते. तेव्हा तेथे एका उभ्या कारजवळ एक महिला रडतरडत धडपड करीत असल्याचे त्यांच्या लक्षात आले. त्यांनी थांबून पाहिले असता कारमध्ये एक चिमुकली अडकल्याचे व कारचे दरवाजे लॉक झाल्याचे आढळून आले. बाहेरगावाहून हे जोडपे आपल्या एक वर्षाच्या मुलीसह नगरला आले होते. मुलीचे वडील कार उभी करून त्या दोघींना तेथे सोडून एका कामासाठी जवळच्या इमारतीत गेले होते. चावी कारमध्येच होती. आई बाहेर थांबली आणि मुलीला कारमध्ये सोडले. कारची चावी आतमध्येच होती. मुलीकडून रिमोटचे बटण दाबले गेले असावे. त्यामुळे कारची दारे लॉक झाली. थोड्या वेळाने आईच्या लक्षात आले. तिने दार उघडण्याचा प्रयत्न केला; मात्र, यश येत नव्हते.
बागूल यांच्यासह आणखी काही जण तेथे थांबले. त्यांनी आत अडकलेल्या मुलीला खाणाखुणा करून बटण दाबण्याची सूचना केली; मात्र, त्या चिमुकलीच्या ते लक्षात येत नव्हते. दीर्घकाळ आत अडकल्यावर मुलीला धोका होता. बाहेर दुसरी चावी नव्हती. त्यामुळे डॉ. बागूल यांनी तातडीने हालचाल करून कारचे दरवाजे दुरुस्ती करणाऱ्या एका ओळखीच्या व्यक्तीला फोन करून बोलावून घेतले. त्याने काच काढून दरवाजा उघडला. त्या वेळी बझर वाजला. बझरचा आवाज ऐकून आणखी काही जण तेथे आले. कारमालकही आले. कारमधून सुटका झालेली मुलगी हसतहसत आई-वडिलांकडे गेली.