सलग चार दिवस भाव स्थिर राहिल्यानंतर शुक्रवारी पेट्रोल दरात पाच पैशांची घसरण झाली. महिनाभरानंतर पहिल्यांदाच पेट्रोल स्वस्त झाल्याने ग्राहकांना दिलासा मिळाला आहे. डिझेलच्या दरात मात्र सलग पाचव्या दिवशी कोणताही बदल झाला नाही. मुंबईत पेट्रोल प्रति लीटर ८० रुपये ८१ पैसे आहे तर डिझेलचा दर प्रति लिटर ६९ रुपये आहे. राजधानी दिल्लीत पेट्रोलसाठी ग्राहकांना ७४ रुपये ८६ पैसे मोजावे लागत असून डिझेल ६५ रुपये ७८ पैसे आहे. बंगळूरमध्ये पेट्रोलचा दर ७७ रुपये ४२ पैसे असून डिझेल ६८.०२ रुपये आहे.
चलन बाजारात डॉलरच्या तुलनेत रुपया ७१.३३ वर व्यवहार करत आहे. गुरुवारी रुपया ७१.२९ वर बंद झाला होता. भारतात खनिज तेलाची मोठ्या प्रमाणात आयात करण्यात येते. ज्यामुळे पेट्रोल आणि डिझेल दर निश्चित करताना चलन विनिमय दर महत्वाचा ठरतो. जागितक कमोडिटी बाजारात खनिज तेलाचा भाव (यूएस क्रूड) २१ सेंटसने कमी झाला. खनिज तेलाचा भाव ६३. १८ डॉलर प्रति बॅरल आहे.