एकीकडे कांद्याच्या किमती गगनाला भिडत असताना, दुसरीकडे कांदेचोरीच्या घटनाही उघड होऊ लागल्या आहेत. मध्य प्रदेशातील मंदसौर इथे कांदेचोरीची एक ताजी घटना आता समोर आली आहे. मंदसौर येथील एका शेतातून चोरांनी ३० हजार रुपये किमतीचे तब्बल ७ क्विंटल कांदे चौरून फरार झाले आहेत. ज्या शेतकऱ्याच्या शेतात चोरी झाली, त्या शेतकऱ्याचे नाव जितेंद्रकुमार असे असून त्याने या चोरीची तक्रार पोलिस ठाण्यात नोंदवली आहे.
जितेंद्रकुमार या शेतकऱ्याने आपल्या १.६ एकर जमिनीत कांदे लावले होते. हे पीक तयार झाले होते आणि जितेंद्रकुमार हे कांदे काढण्याच्या तयारीतच होते. मात्र, तत्पूर्वी ही चोरीची घटना घडली.
कांदे चोरीच्या या घटनेबाबत माहिती देताना मंदसौरच्या नारायणगड पोलिसांनी सांगितले की, शेतकरी जितेंद्रकुमार हे कांद्याचे पीक काढण्याच्या तयारीतच होते. मात्र, चोरांनी रात्रीच ही चोरी केली. याबाबत पोलिसांना तक्रार प्राप्त झाली असून तक्रारीवरून तपास सुरू झाल्याचे पोलिसांनी सांगितले. या प्रकरणी पोलिसांच्या एका टीमने शेताचा दौराही केला असल्याचे पोलिसांनी सांगितले. या बाबतचा पुढील तपास सुरू आहे.
सध्या किरकोळ बाजारात कांद्याचे भाव १०० रुपये प्रतिकिलो इतके झाले आहेत. महाराष्ट्रातील पुरामुळे कांद्याचे उत्पादन घटल्याने कांद्याच्या पुरवठ्यावर परिणाम झाला आहे. कांद्याचे वाढते भाव लक्षात घेत मध्य प्रदेश सरकारने साठेबाजांवर कारवाईचा बडगा उगारला आहे
गेल्याच आठवड्यात मध्य प्रदेशातील शिवपुरी भागात काही लोक तब्बल २० लाख रुपये किंमतीचे कांदे घेऊन फरार झाले आहेत.
कांद्याच्या वाढत्या किमतीचे पडसाद संसदेतही उमटले. लोकसभेत मंगळवारी सत्तापक्ष आणि विरोधकांमध्ये आरोप-प्रत्यारोपांच्या फैरी झडल्या. अशा स्थितीत साठेबाजांच्या मुसक्या आवळण्यासाठी केंद्र सरकारने मोठा निर्णय घेत कांद्याच्या घाऊक आणि किरकोळ व्यापाऱ्यांना साठा करण्याची मर्यादा ५० टक्क्यांनी घटवून ती अनुक्रमे २५ टन आणि ५ टन इतकी केली आहे.
केंद्रीय ग्राहक व्यवहार, अन्न व सार्वजनिक वितरण मंत्रालयाने जारी केलेल्या आदेशानुसार, देशातील सर्व राज्यातील कांदा घाऊक विक्रेते यापुढे २५ टनापेक्षा जास्त कांदा आपल्या साठ्यात ठेवू शकणार नाहीत, तर किरकोळ व्यापाऱ्यांसाठी कांद्याच्या साठ्याची मर्यादा पाच टन इतकी आहे.