रात्री उशिरा घरी जात असताना तरुणीची छेड काढणाऱ्या आरोपीचा पाठलाग करुन तिने त्याच्या मुसक्या आवळल्याची घटना उघडकीस आली. जावेद शहा असे या आरोपीचे नाव आहे. दादर ते अंधेरी असा लोकलमधून पाठलाग करून या तरुणीनेच आरोपीला पकडून अंधेरी रेल्वे पोलिसांकडे सोपवले. या प्रकरणी अंधेरी रेल्वे पोलिस ठाण्यात गुन्हा नोंदवण्यात आला आहे.
व्यवसायाने वकील असलेली ही महिला पश्चिम रेल्वेवरील दादर स्थानकातून घरी जात होती. शनिवारी रात्री १०.३०च्या सुमारास बोरिवली लोकलची वाट पाहत ती उभी होती. यावेळी आरोपीने पाठीमागून येऊन महिलेच्या गुप्तांगाला स्पर्श केला. या कृतीमुळे क्षणभर महिला घाबरली. मात्र दुसऱ्याच क्षणी तिने स्वत:ला सावरत आरोपीला धडा शिकवण्याचा निर्णय घेतला. दरम्यान याचवेळी लोकल आल्याने आरोपीने गर्दीचा फायदा घेऊन लोकलमध्ये प्रवेश केला.
दादरच्या गर्दीतून लोकल पकडत अतिशय हिंमतीने त्या तरुणीने आरोपीचा पाठलाग केला. अंधेरी स्थानकात लोकलमधील गर्दी कमी झाली. याचवेळी तरुणीने दरवाजात असलेल्या आरोपीला ओळखले. त्याला दरवाजातून खेचत बाहेर काढले. फलाटावर उभ्या असलेल्या रेल्वे पोलिसांकडे आरोपीला सोपवून त्याची तक्रार करण्यासाठी तिने अंधेरी पोलिस ठाणे गाठले.
अंधेरी रेल्वे पोलिसांनी तरुणीची तक्रार तातडीने दाखल करू गुन्हा नोंदवला. हा गुन्हा दादर स्थानकात घडल्याने पुढील तपासासाठी तो मुंबई सेंट्रल रेल्वे पोलिसांकडे सोपवण्यात आला, अशी माहिती अंधेरी रेल्वे पोलिसांनी दिली.
दादर स्थानकात महिलेची छेड काढणारा आरोपी हा वैद्यकीय अभ्यासक्रमाचा विद्यार्थी आहे. अंधेरी पोलिस स्थानकातून गुन्हा मुंबई सेंट्रल पोलिसांकडे वर्ग करण्यात आला आहे. आरोपीला न्यायालयीन कोठडी सुनावण्यात आली असून या प्रकरणी तपास सुरू आहे.