पासपोर्ट पडताळणीत एका व्यक्तीकडून सिंहगड रोड पोलिस ठाण्यातील तीन कर्मचाऱ्यांनी पैसे घेतल्याचे समोर आले आहे. या प्रकरणी प्राथमिक चौकशी केल्यानंतर या तीन पोलिसांना झोन तीनच्या पोलिस उपायुक्त पौर्णिमा गायकवाड यांनी निलंबित केले आहे. त्यामुळे पोलिस दलात मोठी खळबळ उडली आहे.
पोलिस नाईक यशवंत सातव, अभय काळे आणि अमोल हिरवे अशी निलंबित करण्यात आलेल्या तिघांची नावे आहेत. हे तिन्ही कर्मचारी सिंहगड पोलिस ठाण्यात नेमणुकीस आहेत. ते पोलिस ठाण्याच्या पासपोर्ट पडताळणी विभागात काम करत होते. गेल्या महिन्यात एक व्यक्ती पासपोर्ट पडताळणीसाठी पोलिस ठाण्यात आली होती. त्या वेळी या पोलिसांनी त्यांना अहवाल देण्यासाठी चार ते पाच हजार रुपयांची मागणी केली. तसेच, त्यांच्याकडून तीन हजार रुपये घेतले. त्या व्यक्तीने हा सर्व प्रकार पोलिस आयुक्तालयातील एका वरिष्ठ अधिकाऱ्यांच्या कानावर घातला. त्यानंतर या घटनेची चौकशी करण्याचे आदेश झोन तीनच्या उपायुक्त पौर्णिमा गायकवाड यांना दिले होते. या प्रकणारची वरिष्ठ स्थरावरून चौकशी करण्यात आली. त्यात पोलिसांनी तीन हजार रुपये घेतल्याचे निष्पन्न झाले. त्यानुसार या तिघांवर सोमवारी कारवाई करून पोलिस खात्यातून निलंबित करण्यात आले. अतिवरिष्ठ अधिकाऱ्याकडे तक्रार करणारी व्यक्तीदेखील पोलिस खात्याशी संबधित आहे. त्यांनी वरिष्ठ पोलिस अधिकाऱ्यांना ही गोष्ट सांगितल्यानंतर हे प्रकरण बाहेर आले. या कारवाईनंतर पोलिस दलात खळबळ उडाली आहे. एकीकडे पासपोर्ट पडताळणीमध्ये पुणे पोलिस देशात पहिल्या क्रमांकावर आहेत. त्यामुळे शहरात असा प्रकार घडल्याने वरिष्ठ अधिकाऱ्यांनी त्याची तत्काळ दखल घेऊन कारवाई केली.