पश्चिम आफ्रिकेतील माली देशात ‘आयएस’च्या दहशतवाद्यांविरोधात सुरू असलेल्या लष्करी कारवाईदरम्यान दोन हेलिकॉप्टरची हवेत टक्कर होऊन १३ फ्रेंच सैनिक ठार झाले. सोमवारी संध्याकाळी ही दुर्घटना घडली. या दुर्घटनेमुळे आपल्याला अतीव दु:ख झाल्याचे फ्रान्सचे अध्यक्ष इमॅन्युअल मॅक्रॉन यांनी मंगळवारी सांगितले. साहेल भागात आयएसच्या दहशतवाद्यांविरोधात लढा देणाऱ्या फ्रेंच सैनिकांच्या शौर्याचे कौतुक करताना, आपण कायम फ्रान्सच्या लष्कराच्या पाठिशी आहोत, अशी ग्वाही मॅक्रॉन यांनी एका लेखी निवेदनाद्वारे दिली. मात्र, या निवेदनामध्ये हेलिकॉप्टर दुर्घटनेबद्दल आणखी कोणतेही तपशील देण्यात आलेले नाहीत. ही दुर्घटना नेमकी कशामुळे झाली, याचा तपास सुरू करण्यात आल्याची घोषणा फ्रान्सच्या संरक्षण मंत्री फ्लोरेन्स पार्ली यांनी केली. माली मध्ये गेल्या काही आठवड्यांपासून आयएस या दहशतवादी संघटनेच्या हिंसक कारवायांमध्ये मोठी वाढ झाली असून, दहशतवादी कारवायांमध्ये दोन महिन्यांमध्ये सुमारे १०० स्थानिक सैनिक मारले गेले आहेत. पश्चिम आणि मध्य आफ्रिकी देशांमधील लष्करी मोहिमेत फ्रान्सचे सुमारे ४,५०० सैनिक तैनात आहेत. परकीय भूमीवरील फ्रान्सचे हे सर्वात मोठे लष्करी पथक आहे.