एका १४ वर्षीय मुलीनं सेक्सला नकार दिला म्हणून तरूणानं तिला मारहाण केल्याची धक्कादायक घटना नालासोपाऱ्यात घडली आहे. आरोपी तरूणानं तिचं डोकं भिंतीवर आपटलं. यात ती जखमी झाली. या घटनेनंतर तिच्याजवळील मोबाइल फोन घेऊन आरोपी फरार झाला आहे.
पीडित मुलगी आणि आरोपी तरूण हे दोघेही एकाच इमारतीत राहतात. ओळखीचा गैरफायदा घेत रविवारी रात्री साधारण पावणे नऊच्या सुमारास तो या मुलीला इमारतीच्या टेरेसवर घेऊन गेला. तेथे त्यानं तिचा विनयभंग करण्याचा प्रयत्न केला. त्यानंतर शारीरिक संबंधांची मागणी केली. त्यावर तिनं नकार दिला. पण त्यानं जबरदस्ती करण्याचा प्रयत्न केला. तिनं प्रतिकार केला. या गोष्टीचा त्याला राग आला. त्यानं तिचे केस पकडले आणि तिचं डोकं टेरेसवरील भिंतीवर आपटलं. घटनेनंतर त्यानं तिच्याकडील मोबाइल फोन हिसकावला आणि तेथून पसार झाला.
डोकं भिंतीवर आपटल्यानं मुलीच्या डोक्याला जबर मार लागला आहे. तिच्या पाठीवर आणि हाताला जखमा झाल्या आहेत. घरी गेल्यानंतर तिनं घडलेली घटना पालकांना सांगितली. त्यानंतर त्यांनी पोलिसांत तक्रार दाखल केली. तुलिंग पोलिसांनी तरुणाविरोधात गुन्हा दाखल केला आहे. आरोपी तरूणाचा पोलीस शोध घेत आहेत.