जादूटोण्यामुळे वडिलांचा मृत्यू झाल्याच्या संशयावरून काका विष्णू नागरे यांना कायमचेच संपवण्यासाठी पुतण्या अमित नागरे आणि त्याच्या मित्रांनी पार्टीचा बेत आखला होता. पार्टीसाठी घेऊन गेल्यानंतर अति मद्यप्राशनामुळे नशेत असलेल्या विष्णू यांची अगोदरच घटनास्थळी लपवलेल्या हत्यारांनी वार करून हत्या केल्याची बाब शिळ डायघर पोलिसांच्या चौकशी पुढे आली आहे. या प्रकरणात पोलिसांनी आणखी तीन आरोपींना नाशिकच्या इगतपुरीमधून अटक केले आहे. पिंपरी गावातील डोंगराच्या पायथ्याशी १५ नोव्हेंबरला सकाळी एका व्यक्तीचा शिर नसलेला मृतदेह आढळून आल्याने खळबळ उडाली होती. पोलिसांनी तात्काळ मृत व्यक्तीची ओळख पटवली असता, या व्यक्तीचे नाव विष्णू नागरे (४५) असून तो दहिसर गावात राहत असल्याची माहिती समोर आली. या पथकाने ५० जणांकडे चौकशी केल्यानंतर विष्णू यांचा पुतण्या अमित प्रल्हाद नागरे (१९) याच्याकडे विचारपूस केली. त्याच्या चौकशीत विसंगती आढळून आल्याने पोलिसांचा त्याच्यावर संशय बळावला. सखोल चौकशीअंती त्यानेच मित्रांच्या मदतीने काकाची हत्या केल्याचे निष्पन्न झाले. सुरुवातीला अमितसह अमर शर्मा या दोघांना अटक झाली होती. त्यानंतर निहाल शंकर हांडोरे (२१), अविनाश दिगंबर वानखेडे (२२), शुभम बाबुराव ढबाले (१९) यांना नुकतीच नाशिकच्या इगतपुरीमधून अटक केली आहे.