पायधुनी येथे राहणाऱ्या एका २३ वर्षीय तरुणीची आई आणि भावाने हत्या केल्याची धक्कादायक घटना रविवारी घडली. एका तरुणासोबत प्रेमविवाह करण्यासाठी घरातून पळून जात असताना त्या दोघांनी तिला अडविले आणि तिची हत्या केली. निर्मला वाघेला असे या तरुणीचे नाव असून पायधुनी पोलिसांनी तिची आई शालू वाघेला आणि भाऊ पप्पू वाघेला यांना अटक केली आहे.
निर्मला ही पायधुनी येथे आई आणि भावासोबत राहत होती. निर्मला हिचे याच परिसरात राहणाऱ्या एका तरुणाशी प्रेमप्रकरण होते. काही दिवसांपूर्वी याबाबत तिच्या आई आणि भावाला कूणकूण लागली. त्यावरून त्यांच्यात अनेकदा खटके उडाले. रविवारी रात्री नऊच्या सुमारास याच कारणावरून घरात भांडण झाले. यामुळे रागावलेल्या निर्मला त्या तरुणाबरोबर पळून जाण्यास निघाली. मात्र, आई व भावाने तिला घरातच थांबविले आणि मारहाण केली. तरीही ती ऐकत नसल्याचे पाहून अखेर त्या दोघांनी ओढणीने तिचा गळा आवळला. यामध्ये निर्मलाचा जागीच मृत्यू झाला. यानंतर आई स्वतः पोलिसांना शरण गेली आणि तिने सर्व घटनाक्रम पोलिसांना सांगितला. यानंतर पोलिसांनी गुन्हा दाखल करून दोघांनी अटक केली.