सांगली बायपास मार्गावरील जैनापूर (ता.शिरोळ) येथे टेम्पो आणि मोटारसायकल यांच्यातील भीषण अपघातात तीन तरुण जागीच ठार झाले आहेत. गुणपाल रोजे (२७), सुहास कोठावळे (२६) आणि विपूल रमेश पाटील ऊर्फ अजिंक्य अशी मृतांती नावे असून त्यांपैकी एक दानोळी (ता.शिरोळ) येथील, तर दोघेजण मजले (ता. हातकणंगले) येथील रहिवासी आहेत. या घटनेमुळे दानोळी व मजले गावावर शोककळा पसरली आहे.
रविवारी रात्री साडेनऊच्या सुमारास ही घटना घडली. अपघातानंतर टेम्पोचालक पसार झाला. घटनास्थळावरून मिळालेल्या माहितीनुसार, कोल्हापूर-सांगली बायपास रस्त्यावरून टेम्पो (एमएच १३ एएक्स २६८२) कोल्हापूरच्या दिशेने जात होता. जैनापूर येथे पोल्ट्री फार्मजवळ मोटारसायकल (एमएच ०९ डीटी ५६२४) आणि टेम्पोची धडक झाली. ही धडक इतकी जोरदार होती, की मोटारसायकल टेम्पोच्या पुढील भागात घुसली. अपघातात डोक्याला गंभीर दुखापत झाल्याने गुणपाल रोजे व विपुल पाटील यांचा जागीच मृत्यू झाला; तर कोठावळे यांना गंभीर दुखापत झाली. रुग्णवाहिकेतून सांगली येथील शासकीय रुग्णालयात नेण्यात येत असताना त्यांचा मृत्यू झाला.