दोन मुलींनंतर तिसऱ्यांदाही मुलीचा गर्भ असल्याची माहिती झाल्यानंतर पतीने पत्नीला गर्भपात करण्याचा सल्ला दिला; मात्र पत्नीने गर्भपातास नकार दिल्यानंतर पतीने तीन वेळा तलाक म्हणून पत्नीला घटस्फोट दिल्याचा प्रकार मुजप्फरनगर येथील चप्रा भागात घडला असल्याची माहिती पोलिसांनी गुरुवारी दिली.
फर्जाना असे पत्नीचे नाव असून, गर्भतपासणीमध्ये तिला मुलगीच होणार असल्याचे माहिती झाल्यानंतर पती गालिबने तिला गर्भपात करण्यास सांगितले. फर्जाना यांना आधी दोन मुली असल्याने गालिबला तिसऱ्यांदा मुलगी नको होती; परंतु फर्जाना यांनी गर्भपात करण्यास नकार दिल्यानंतर चिडलेल्या गालिबने तीन वेळा तलाक म्हणून त्यांना घटस्फोट दिला. फर्जाना आणि गालिब यांच्या लग्नाला तीन वर्षे झाली आहेत.
या प्रकरणी गालिबसह त्याच्या घरातील नऊ जणांविरोधात गुन्हा दाखल करण्यात आला आहे. यामध्ये गालिबच्या आईचाही समावेश असल्याची माहिती पोलिसांनी दिली.