आरस्पानी सौंदर्य, बुद्धीमत्ता आणि गुणवत्तेच्या जोरावर गेल्या वर्षी मानुषी छिल्लर हिंन ‘मिस वर्ल्ड’ हा किताब पटकावून भारताचं नाव जगात रोशन केलं. ही सौंदर्यवती आता तिच्या बॉलिवूड पदार्पणासाठी सज्ज झाली आहे. अक्षय कुमारची मुख्य भूमिका असलेल्या ‘पृथ्वीराज’ चित्रपटात ती राजकुमारी संयोगिताच्या भूमिकेत झळकणार आहे.
मोहम्मद घौरीचा सोळा वेळा पराभव करणारा आणि प्रत्येक वेळी त्याला जीवदान देणारा पराक्रमी राजा पृथ्वीराज चौहान यांची शौर्यगाथा या चित्रपटात दाखवली जाणार आहे. यशराज फिल्म्स या ऐतिहासिकपटाची निर्मिती करणार आहे.
‘पृथ्वीराज’ चित्रपटात राजकुमारी संयोगिताची भूमिका साकारण्याबद्दल मानुषी म्हणते, ‘यशराज फिल्म्ससारख्या प्रॉडक्शन हाऊसने त्यांची नायिका म्हणून माझी निवड करणं हा माझा फार मोठा सन्मान आहे. या प्रवासात मला ज्या गोष्टी शिकता येणार आहेत त्याबद्दल मी प्रंचड आनंदी आणि उत्साही आहे. माझं आयुष्य जणू एखादी परीकथा आहे असं मला वाटतंय. ‘मिस इंडिया’ होण्याचा मान मिळणं, त्यानंतर ‘मिस वर्ल्ड’ चा किताब मिळणं आणि आता इतक्या मोठ्या बॅनरसोबत काम करण्याची संधी मिळणं हे सगळंच माझ्यासाठी स्वप्नवत आहे. हे सगळं माझ्या आयुष्यातील नवीन, रोमांचकारी अध्यायाप्रमाणे आहे’ असं मानुषी म्हणाली.
मानुषीला बॉलिवूडमध्ये अभिनेता आमीर खानसोबत काम करण्याची इच्छा असल्याचं तिनं एका मुलाखतीत सांगितलं होतं. ‘ मला चित्रपटात काम करायचंच असेल तर मी आमीर खानसोबत काम करेन. आमीरचे चित्रपट सामाजिक प्रश्नांवर बेतलेले असतात आणि ती गोष्ट मला सर्वात आवडते’ असं ती म्हणाली होती.