डॉक्टरांनी दाखल करून न घेतल्याने रुग्णालयाच्या शोधात फिरत असतानाच एका महिलेची भररस्त्यात प्रसूती झाल्याची घटना नेरच्या माळीपुऱ्यात सोमवारी घडली. नवजात माता व शिशूचा मृत्यूदर कमी व्हावा, दुर्गम भागातील गर्भवती महिलेची प्रसूती घरी होऊ नये, ती रुग्णालयात व्हावी यासाठी शासन जनजागृतीसह विविध योजनांवर कोट्यवधी रुपये खर्च करीत आहे. त्याचा फोलपणा या घटनेने समोर आला आहे.
नेर तालुक्यातील येलगुंडा येथील दुर्गा ज्ञानेश्वर हाके (२५) यांना रविवारी रात्री प्रसूतीकळा सुरू झाल्या. सकाळपर्यंत दुर्गा विव्हळत होत्या. सकाळ होताच पती ज्ञानेश्वर त्यांना घेऊन येलगुंडा बसस्थानकावर आले. बराच वेळ बस मिळाली नाही. त्यामुळे मिळेल त्या वाहनाने त्यांनी नेरचे खासगी रुग्णालय गाठले. बराच वेळ होऊनही डॉक्टर आले नाही. नंतर आले तर भरती करून घेण्यास नकार दिला. त्यामुळे पुन्हा दुसऱ्या रुग्णालयाचा शोध सुरू झाला. प्रसवकळांनी हैराण झालेल्या दुर्गा माळीपुऱ्यात हातपंपाजवळ कोसळल्या. ही बाब काही महिलांना लक्षात येताच त्या धावून आल्या. भररस्त्यात दुर्गा यांनी गोंडस बाळाला जन्म दिला. त्यानंतर त्यांना नेरच्या रुग्णालयात दाखल करण्यात आले.
गावातील एखादी महिला गर्भवती असल्याची नोंद होताच आशासेविका तिची नोंद घेते. तिला सकस आहार पुरविला जातो. तिची प्रसूतीची तारीख जवळ येताच तिच्यावर विशेष लक्ष ठेवले जाते. तिच्यासाठी रुग्णवाहिकेची व्यवस्था पाहिली जाते. सुरक्षित प्रसूतीसाठी प्रयत्न केले जातात. गरोदर माता व नवजात शिशूचे संगोपन व्हावे म्हणून सरकारने ‘जननी शिशू’ योजना आणली. त्याच्या जाहिरातींवर कोट्यवधी रुपये खर्च होतात. पण, नेरमधील या घटनेने या योजनांचा फोलपणा समोर आला आहे.
दरम्यान, नेरचे तालुका वैद्यकीय अधिकारी डॉ. रवींद्र दुर्गे यांनी रस्त्यावर प्रसूती होणे अतिशय गंभीर बाब असून याची सखोल चौकशी करण्यात येईल, असे सांगितले