मुंबई-पुणे एक्स्प्रेस वेवर झालेल्या भीषण अपघातात पुण्यातील प्रसिद्ध अस्थीरोग तज्ज्ञ डॉ. केतन खुर्जेकर यांचा मृत्यू झाला आहे. या अपघातात डॉ. खुर्जेकर यांचे चालक ज्ञानेश्वस भोसले यांचाही मृत्यू झाला आहे. डॉ. खुर्जेकर यांच्या कारला पाठीमागून भरधाव येणाऱ्या लक्झरी बसने जोरदार धडक दिल्याने हा अपघात झाला. या भीषण अपघातात इतर दोन डॉक्टर जखमी झाले आहेत. विशेष म्हणजे, आजच डॉ. खुर्जेकर यांचा वाढदिवस होता. डॉ. खुर्जेकर हे पुण्यातील संचेती रुग्णालयात कार्यरत होते.
या अपघाताबाबत हाती आलेल्या वृत्तानुसार, डॉ. खुर्जेकर वैद्यकीय परिषदेत सहभागी होण्यासाठी मुंबईत आले होते. ही परिषद आटोपल्यानंतर ते पुण्याला परतत होते. वाटेत त्यांच्या गाडीचे (एमएच १४ जीयु ११५८) टायर पंक्चर झाले. डॉ. खुर्जेकर आणि चालक ज्ञानेश्वक भोसले गाडीचे पंक्चर काढत होते. त्याचवेळी भारधाव वेगात येणाऱ्या लक्झरी बसने उभ्या असलेल्या कारला पाठीमागून दोराची धडक दिली. यात दोघांचाही जागीच मृत्यू झाला.
‘डॉ. खुर्जेकर यांच्या जाण्याने मोठी हानी’
डॉ. खुर्जेकर यांच्या जाण्याने वैद्यकीय क्षेत्राची मोठी हानी झाल्याचे संचेती रुग्णालयाचे व्यवस्थापकीय विश्वस्त डॉ. पराग संचेती यांनी म्हटले आहे. डॉ. खुर्जेकर हे निष्णात अस्थीरोग तज्ज्ञ होते. ते संचेती रुग्णालयाच्या अस्थीरोग विभागाचे प्रमुख होते. डॉ. खुर्जेकरांनी आतार्यंत मणक्याच्या ३५०० शस्त्रक्रिया केल्या आहेत. ‘एमएस ऑर्थोपेडिक्स’मध्ये त्यांनी सुवर्णपदक मिळवले आहे.