मुंबई महापालिका आणि एमएमआरडीएने बांधलेल्या काही स्कायवॉकचा गर्दुल्ले, भिकारी आणि प्रेमीयुगुलांनी ताबा घेतला असताना पालिकेने आणखी एक स्कायवॉक उभारण्याचा निर्णय घेतला आहे.
तब्बल ६६ कोटी रुपये खर्च करून कांदिवली रेल्वे स्थानक ते डॉ. बाबासाहेब आंबेडकर शताब्दी रुग्णालयापर्यंत हा स्कायवॉक उभारण्यात येणार आहे. या प्रस्तावाला स्थायी समितीत कुणीही विरोध न केल्याने प्रस्ताव मंजूर झाला. मुंबईत अनेक ठिकाणी स्कायवॉक बांधण्यात आले आहेत. यातील वांद्रे स्थानक ते कलानगर स्कायवॉकचा सर्वाधिक वापर होतो. उर्वरित स्कायवॉकचा वापर कमी असल्याने काही स्कायवॉकवर गर्दुल्ले, बेघर, भिकारी व प्रेमीयुगुलांचा वावर वाढला आहे. दहिसर येथील स्कायवॉकचा वापरच होत नसल्यामुळे शिवसेना नगरसेविका शीतल म्हात्रे यांनी हा स्कायवॉक बंद करण्याची मागणी लावून धरली आहे. तसेच एकीकडे स्कायवॉक नापास ठरले असताना पालिकेने पुन्हा स्कायवॉक उभारण्याचा निर्णय घेतला आहे.
कांदिवली रेल्वे स्थानकातून शताब्दी रुग्णालयाकडे जाणाऱ्या मार्गावर पादचाऱ्यांसह रुग्णांची संख्या मोठी असल्यामुळे त्यांच्यासाठी स्कायवॉक उभारण्यात येत असल्याचे पालिका प्रशासनाने स्पष्ट केले आहे. सुमारे ८२५ मिटर लांब व ३.२० मिटर रुंदीचा हा स्कायवॉक असेल. असे प्रशासनाकडून सांगण्यात आले. चर्चेविना प्रस्ताव मंजूर कांदिवली पश्चिम रेल्वे स्थानक ते शताब्दी रुग्णालयादरम्यान स्कायवॉक उभारण्याचा प्रस्ताव बुधवारी स्थायी समितीत मांडण्यात आला होता. त्यावर यापूर्वी स्कायवॉकला विरोध करणाऱ्या नगरसेवकांनी तोंडेही उघडली नाहीत. शिवसेना, भाजप, काँग्रेस या एकाही राजकीय पक्षाच्या नगरसेवकाने विरोध न केल्याने कोणतीही चर्चा न होताच हा प्रस्ताव मंजूर झाला.