कुत्रा चावला तर तात्काळ लस मिळणे आवश्यक असते. परंतु, माजलगाव ग्रामीण रुग्णालयाने जर पाच जणांना कुत्रे चावले तरच लस फोडण्यात येईल, असा अजब नियम केला आहे. त्या आशयाचा फलक रुग्णालयात लावण्यात आला आहे हे विशेष.
नागरिकांच्या हक्काचे रुग्णालय म्हणून सरकारी रुग्णालय ओळखले जाते. माजलगाव ग्रामीण रुग्णालयात ही दररोज अनेक रुग्ण उपचार घेण्यास येतात. मात्र, या रुग्णालयात एक अजब नियम केला आहे. कुत्रे चावल्यानंतर लस घ्यावयाची असेल तर एकट्या रुग्णासाठी लस उपलब्ध असणार नाही. कुत्रे चावलेले पाच रुग्ण असतील तर लस फोडली जाईल, अशी सूचनाच रुग्णालय प्रशासनाने लावली आहे. एक रुग्ण या लस घेण्यास गेला तर मात्र इतर चार जणांना जेव्हा कुत्रे चावेल तेव्हाच रॅबिपूर लस देण्यात येईल, असा फलकच रुग्णालयात लावण्यात आला आहे. त्यामुळे रुग्णांना सरकारी रुग्णालयात लस या नियमामुळे अडचण होणार असून या सुचनेचा चक्क बोर्डदेखील ग्रामीण रुग्णालयात लावण्यात आला आहे. केवळ दिवसांत एक तासातच कुत्रे चावल्याची लस देण्यात येईल, असे देखील बोर्डावर नमूद आले आहे. त्यामुळे जर त्या वेळेतच रुग्ण आला तर त्याला सेवा मिळेल असेही सूचनेत म्हटले आहे. शहरात मोकाट कुत्र्याचा हौदस दिवसेंदिवस वाढत आहे. यात अनेक कुत्रे हे नागरिकांना चावा देखील घेत आहेत. यात अनेक जण गंभीर जखमी झाले आहेत, असे असताना ग्रामीण रुग्णालयात या कारणामुळे लसदेखील उपलब्ध होत नाहीत.