उत्तर प्रदेश येथून कुटुंबासह एक्स्प्रेसमधून गावाहून आल्यानंतर कल्याण येथून अंबरनाथ येथे घरी येत असताना, गुरुवारी सकाळी लोकलच्या दरवाजात गर्दीमुळे पडून तरुण जखमी झाल्याची घटना गुरुवारी घडली. सध्या या तरुणाची प्रकृती चिंताजनक आहे.
राकेश साकेत हा तरुण कुटुंबासह उत्तर प्रदेश येथून एक्स्प्रेसने कल्याण रेल्व स्थानकावर उतरला होता. त्याच्यासोबत त्याची बहीणही होती. राकेशने गुरुवारी सकाळी कल्याणहून अंबरनाथला येण्यासाठी लोकल पकडली होती. मात्र राकेशकडे बॅगा असल्याने तो गर्दीत लोकलच्या दरवाजात उभा होता. त्यात लोकलच्या गर्दीमुळे राकेशचा तोल गेल्याने तो विठ्ठलवाडी आणि उल्हासनगर रेल्वे स्थानकाच्या दरम्यान खाली पडला. रेल्वेच्या कर्मचाऱ्यांनी घटनास्थळी धाव घेत, त्याला उल्हासनगर मध्यवर्ती रुग्णालयामध्ये दाखल केले. मात्र राकेशच्या डोक्याला जबर मार लागल्याने त्याची प्रकृती चिंताजनक असून त्याला कळवा येथील सरकारी रुग्णालयात दाखल करण्यात आले आहे. या प्रकरणी कल्याण लोहमार्ग पोलिस ठाण्यात नोंद करण्यात आली आहे.