कामोठे येथील एमजीएम इंजिनीअरिंग कॉलेजमधील विद्यार्थिनीकडे पाहून हस्तमैथुन करणाऱ्या विनोद फड (३०) या तरुणाला न्यायालयाने येत्या २७ ऑगस्टपर्यंत पोलिस कोठडी ठोठावली आहे. गुरुवारी दुपारी आरोपी तरुणाने कॉलेजातील झेरॉक्स सेंटरसमोर सर्वांदेखत हा प्रकार केला होता. त्यानंतर त्याठिकाणी असलेल्या कॉलेजातील तरुणांनी व पीडित तरुणीने आरोपी तरुणाला चोप देऊन त्याला पोलिसांच्या स्वाधीन केले होते. दरम्यान, या प्रकरणात महाविद्यालयाच्या प्राचार्यांनी चालढकल केल्याने शुक्रवारी त्यांच्यावर बडतर्फीची कारवाई करण्यात आली. फड हा याच कॉलेजचा माजी विद्यार्थी आहे.
मात्र, आरोपी विनोद फड याला एका खोलीमध्ये बसवून प्राचार्य आपल्या कार्यक्रमात व्यग्र झाले. त्यामुळे संतापलेल्या विद्यार्थ्यांनी महाविद्यालयात गोंधळ घालण्यास सुरुवात केली. मात्र प्राचार्यांनी विद्यार्थ्यांच्या गोंधळाकडे दुर्लक्ष करून आपला नियोजित कार्यक्रम सुरूच ठेवला. अखेर विद्यार्थ्यांचा गोंधळ वाढल्यानंतर प्राचार्यांनी कामोठे पोलिसांना पाचारण करून आरोपी विनोद फड याला पोलिसांच्या स्वाधीन केले.
त्यानंतर आरोपी विनोद फड याच्यावर गुन्हा दाखल करून त्याला अटक करावी, अशी मागणी करत विद्यार्थ्यांनी कामोठे पोलिस ठाण्यात धाव घेत त्याठिकाणीही गोंधळ घालण्याचा प्रयत्न केला. त्यानंतर रात्री उशिरा पोलिसांनी आरोपी विनोद फड याच्यावर विनयभंगाचा गुन्हा दाखल करून त्याला अटक केली. शुक्रवारी त्याला न्यायालयात हजर करण्यात आले असता, न्यायालयाने त्याची २७ ऑगस्टपर्यंत पोलिस कोठडीत रवानगी केली.
प्राध्यापकांकडूनही छळ
दरम्यान, कामोठे येथील इंजिनीअरिंग कॉलेजातील विद्यार्थिनीसोबत घडलेल्या प्रकारानंतर विद्यार्थ्यांनी शुक्रवारी देखील आंदोलन करून काही प्राध्यापकांकडून विद्यार्थिनींचा लैंगिक छळ होत असल्याचा आरोप करत घोषणाबाजी केली. तसेच प्राचार्य व प्राध्यापकांवर कारवाईची मागणी लावून धरली. त्यामुळे परिमंडळ-२ चे पोलिस उपायुक्त अशोक दुधे व इतर वरिष्ठ अधिकाऱ्यांनी कॉलेजात धाव घेऊन विद्यार्थ्यांची समजूत काढली. अखेर कॉलेज प्रशासनाकडून प्राचार्यांना बडतर्फ करण्यात आल्यानंतर विद्यार्थ्यांनी आपले आंदोलन थांबवले.