टीम इंडियाचा मध्यमगती गोलंदाज भुवनेश्वर कुमार आणि त्याच्या वडिलांना जीवे मारण्याची धमकी देण्यात आली असून याबाबत मेरठमधील इनचौली पोलीस ठाण्यात तक्रार दाखल करण्यात आली आहे.
भुवनेश्वर आणि त्याचे वडील किरनपाल सिंह यांना एका जमीन प्रकरणात ही धमकी आली आहे. सिंह यांनी बुलंदशहरात राहणाऱ्या रणवीर सिंह यांच्याशी ८० लाखांचा जमिनीचा व्यवहार केला होता. ठरलेल्या व्यवहारानुसार किरनपाल यांनी इंटरनेट बँकिंगच्या माध्यमातून संपूर्ण रक्कम ट्रान्स्फर केली. मात्र रणवीरने अद्याप जमीन किरनपाल यांच्या नावावर करून दिलेली नाही. रणवीरला एका हत्याप्रकरणात अटक झालेली असून तो सध्या कारागृहात आहे.
दरम्यान, पैसे घेऊनही जमीन नावावर करण्यास टाळाटाळ करणारा रणवीर उलट आम्हालाच धमकावत आहे. त्याने आणि त्याच्या साथीदारांनी मला आणि माझ्या मुलाला जीवे मारण्याची धमकी दिली आहे, असे किरनपाल सिंह यांनी आपल्या तक्रारीत नमूद केले आहे. रणवीरसह सहा जणांविरूद्ध त्यांनी तक्रार केली आहे. भुवनेश्वर सध्या श्रीलंका दौऱ्यावर असून त्याचे कुटुंबिय मेरठमध्ये राहत आहेत.