बेस्टचे गतवैभव मिळवून देण्याचे आणि प्रवाशांना आधुनिक सुविधांचा लाभ देणारे अनेक महत्त्वपूर्ण निर्णय मुंबई महापालिकेचे आयुक्त प्रवीण परदेशी यांनी शुक्रवारी जाहीर केले. बेस्ट बसचा ताफा ६ हजारांवर नेणे, किमान तिकीट पाच रु., मेट्रोच्या मार्गावर प्रायोगिक तत्त्वावर मोफत बससेवा, वातानुकूलित बस नव्याने दाखल करणे, गर्दीच्या मार्गावर १५०० एसी बस, अॅपआधारित सेवा, बस नेमकी कधी येणार याची माहिती देणाऱ्या अत्याधुनिक तंत्रज्ञानासारख्या उपायांनी बेस्टचा चेहरामोहरा बदलला जाणार आहे. या प्रत्यक्ष बदलांचा लाभ मुंबईकरांना सप्टेंबर-ऑक्टोबरपासून मिळणार असल्याचे परदेशी यांनी स्पष्ट केले.
‘बेस्टच्या ताफ्यात असलेल्या ३३३७ बस ६ हजारांपर्यंत वाढवण्यात येणार आहे. भविष्यातील बेस्टचा प्रवास अधिक आरामदायी करण्यावर भर आहे. त्यासाठी ताफ्यात येणाऱ्या नवीन बस एसी असतील’, अशी महत्त्वपूर्ण घोषणाही त्यांनी केली.
बेस्टच्या भाड्यासंदर्भात बोलताना कमी अंतरासाठीचे तिकीट पाच रुपये केले जाईल, असेही आयुक्तांनी स्पष्ट केले. मेट्रो सेवांनी बेस्टच्या मार्गांवर विपरित परिणाम झाल्याच्या मुद्द्यावर आयुक्तांनी ‘फीडर सेवा’ वाढविणार असल्याचे स्पष्ट केले. लोकल, मेट्रो, बेस्ट सेवा एकमेकांना पूरक असल्याचे स्पष्ट करतानाच, ‘मेट्रो थांब्याकडून जवळच्या अंतरासाठी प्रायोगिक तत्त्वावर मोफत बससेवा चालविल्या जातील’, असेही नमूद केले. ‘या सेवांना मिळणारा प्रतिसाद, प्रवासीसंख्येचा अभ्यास करून त्यावर निर्णय घेतला जाईल. गर्दीच्या रेल्वे स्थानकांच्या परिसरात १५०० एसी मिनी बस चालवल्या जाणार आहेत. त्यामुळे स्थानक ते घर असा किफायतशीर प्रवास प्रवाशांना उपलब्ध होणार आहे’, अशी माहितीही त्यांनी दिली.