दिल्ली मेट्रोमधून महिला प्रवाशांना नि:शुल्क प्रवासाची सुविधा देण्याच्या आप सरकारच्या प्रस्तावित योजनेला मेट्रो मॅन ई. श्रीधरन यांनी तीव्र विरोध दर्शवला आहे. दिल्ली मेट्रोचे माजी प्रमुख असणाऱ्या श्रीधरन यांनी या प्रकरणी पंतप्रधान नरेंद्र मोदी यांना एक पत्र लिहिले असून या प्रस्तावास पंतप्रधानांनी सहमती दर्शवू नये, असे आवाहन त्यांनी केले आहे.
दिल्ली मेट्रो व बससेवेमधून महिला प्रवाशांना नि:शुल्क प्रवासाची सुविधा देण्याचा मानस दिल्लीतील आप सरकारने व्यक्त केला आहे. ‘अशा सुविधेमुळे दिल्ली मेट्रो अकार्यक्षम व दिवाळखोर होईल. हा निर्णय मेट्रो सेवेसाठी घातक पायंडा ठरेल. देशातील अन्य मेट्रोंपर्यंत हे लोण पसरेल व सर्व मेट्रोंना राज्य सरकारांच्या अनुदानांवर अवलंबून रहावे लागेल, असा इशारा श्रीधरन यांनी दिला आहे. आप सरकारला महिला प्रवाशांची एवढी काळजी असेल तर त्यांनी सरकारी तिजोरीतून थेट या खर्चाची सोय करावी असा टोलाही त्यांनी मारला आहे.
ही मेट्रो कोणालाही विनाशुल्क वापरता येणार नाही, अशी भूमिका आपण या मेट्रोचा पहिला टप्पा सुरू झाला तेव्हा म्हणजे २००२मध्ये घेतला होता. तत्कालीन पंतप्रधान अटलबिहारी वाजपेयी यांनीही प्रसंगी तिकीट काढूनच मेट्रोने प्रवास केला होता, याकडे श्रीधरन यांनी लक्ष वेधले.
या पत्रानंतर आप सरकारने एक पत्रक काढून आपल्या भूमिकेचा बचाव केला. श्रीधरन यांच्या मताचे आम्ही स्वागत करतो, मात्र आम्ही त्यांच्याशी सहमत नाही. महिलांना देण्यात येणाऱ्या या सुविधेमुळे मेट्रोला आर्थिक तोटा होणार नाही, असा दावा आपने केला. या प्रस्तावाचा सरकारने पुनर्विचार करावा, असे आवाहन भाजप व काँग्रेसने केले.