कोलकाता येथे डॉक्टरांवर झालेल्या अमानुष हल्ल्याच्या निषेधार्थ देशभरातील खासगी व सरकारी रुग्णालयांतील निवासी आणि शिकाऊ डॉक्टर आज, शुक्रवारी काम बंद आंदोलन करणार आहेत. राज्याच्या सार्वजनिक रुग्णालयांमधील सुमारे दहा हजार डॉक्टर या निषेध आंदोलनात सहभागी होणार असल्याने मुंबईसह राज्यातील वैद्यकीय सेवा कोलमडण्याची दाट शक्यता आहे.
या निषेध आंदोलनामध्ये रुग्णांचे हाल होऊ नयेत यासाठी रुग्णालय प्रशासनाने पर्यायी व्यवस्थेची तयारी सुरू केली आहे. डॉक्टरांना रुग्णालयांत सुरक्षित वातावरण द्या, डॉक्टरांवर हल्ला केलेल्या आरोपींना तातडीने पकडा, अशा प्रमुख मागण्या डॉक्टरांच्या संघटनांनी केल्या आहेत. नवी दिल्लीतील अखिल भारतीय आयुर्वेदिक संस्थानासह राज्यातील सरकारी व बाह्य रुग्ण विभाग, वॉर्ड तसेच व्याख्यानालाही निवासी डॉक्टरही वैद्यकीय सेवा देणार नाही, मात्र यावेळी आपत्कालीन सेवा सुरू ठेवली जाईल, अशी माहिती सेंट्रल मार्डच्या अध्यक्षा डॉ. कल्याणी डोंगरे यांनी दिली. पश्चिम बंगालमध्ये डॉक्टरांवर झालेल्या दोन हल्ल्यांतील आरोपींना कठोर शिक्षा व्हावी, तसेच देशभरातील डॉक्टरांना सुरक्षा पुरवावी, अशी मागणी डॉक्टरांकडून करण्यात आली आहे. राज्यातील सरकारी व पालिका रुग्णालये बंद ठेवणार असल्याची घोषणा सेंट्रल मार्ड या निवासी डॉक्टरांच्या संघटना आणि असोसिएशन ऑफ स्टेट मेडिकल इंटर्न्स महाराष्ट्र (अस्मी) या कनिष्ठ वैद्यकीय डॉक्टरांच्या संघटनेने केली आहे. यासह इंडियन मेडिकल असोसिएशन (आयएमए) या खासगी डॉक्टरांच्या संस्थेकडूनही तसेच देशभरातील विविध राज्यांतील निवासी डॉक्टरांच्या संघटनांकडून निदर्शने केली जाणार आहेत. राज्यातील १७ सरकारी व पालिका रुग्णालयांतील साडेसात हजार निवासी डॉक्टर आणि दोन हजार शिकाऊ (इंटर्न) डॉक्टर उद्या काम बंद आंदोलनात सहभागी होणार आहेत. त्यामुळे बाह्य रुग्ण विभाग, वॉर्डमध्ये काम करणार नाहीत असे सांगण्यात आले.