भारताची वन-डे क्रिकेट वर्ल्ड कप स्पर्धेतील पुढील लढत न्यूझीलंडविरुद्ध १३ जून रोजी होणार आहे. ही लढत येथील ट्रेंटब्रिजवर होणार आहे. मात्र, या लढतीवर पावसाचे सावट असल्याचा अंदाज हवामान खात्याने वर्तविला आहे.
गुरुवारी जोरदार पावसाची शक्यता वर्तविण्यात आली असली, तर जेवण्याच्या वेळेपर्यंत पाऊस थोडा कमी होईल, असे अंदाज वर्तविण्यात आला आहे. मैदान खेळण्यायोग्य असल्यास काही षटकांचा खेळ होणे अपेक्षित आहे. येथील जास्तीत जास्त तापमान १३ अंश सेल्सिअस असणार आहे, तर रात्रीचे कमीतकमी तापमान १० किंवा ११ अंश सेल्सिअस असणार आहे. लंडनमध्ये सध्या मागील दोन दिवसांपासून सातत्याने मध्यम व हलक्या स्वरुपाचा पाऊस सुरू आहे. येथील स्थानिक हवामान खात्याने रहिवाशांना दक्षतेचा इशारा दिला आहे. अशा स्वरूपाचा पाऊस आठवडाभर राहणार आहे. हवामान खात्याने ही माहिती स्थानिक वेबसाइटवर दिली आहे. इंग्लंडच्या बहुतांश भागाला या पावसाचा फटका बसणार आहे. यात बर्मिंगहॅम, पीटरबर्ग, न्यूकॅस्टल या भागांचाही समावेश आहे. काही भागात जोरदार पावसाचीही शक्यता वर्तविण्यात आली असून, पूरस्थितीमुळे वाहतुकीला फटका बसू शकतो, असा इशाराही देण्यात आला आहे. नॉटिंगहॅममध्ये तर बुधवारी सायंकाळी सात वाजेपर्यंत जोरदार पावसाची शक्यता वर्तविण्यात आली आहे.
भारताने या वर्ल्ड कपमध्ये सलग दोन लढती जिंकल्या आहेत. भारताने सलामीच्या लढतीत दक्षिण आफ्रिकेला नमविले, तर दुसऱ्या लढतीत गतविजेत्या ऑस्ट्रेलियाला पराभूत केले आहे. न्यूझीलंडनंतर भारताची रविवारी पाकिस्तानविरुद्ध लढत होत आहे. या लढतीत मात्र पावसाची शक्यता नसल्याचे आता तरी दिसते आहे. भारताविरुद्ध खेळण्यापूर्वी पाकिस्तान संघ ऑस्ट्रेलियाविरुद्ध खेळणार आहे.