मुंबईतील गगनचुंबी इमारतींच्या अग्निसुरक्षेसाठी ‘ब्राण्टो स्कायलिफ्ट एफ ९०’ ही नवी गाडी मुंबईत आली आहे. अग्निशमन दलाच्या ताफ्यात लवकरच ती दाखल होईल. या गाडीमुळे ३०व्या मजल्यापर्यंत लागलेल्या आगीशी मुकाबला करता येणार आहे.
काळबादेवी आगीत दुर्देवी मृत्यू ओढवलेले अग्निशमन अधिकारी सुनील नेसरीकर यांनी मुंबईच्या सुरक्षेसाठी फिनलंड येथे जाऊन या गाडीची निवड केली होती. त्यामुळे या गाडीसोबत त्यांच्याही आठवणी जोडल्या गेल्या आहेत. यापूर्वी अग्निशमन दलाकडे केवळ २२व्या मजल्यापर्यंत जाणारी ब्राण्टो गाडी होती. या नव्या ब्राण्टोमुळे अग्निशमन दल अधिक सुसज्ज झाला असल्याचे मुंबईचे मुख्य अग्निशमन अधिकारी पी.एस. रहांदळे यांनी सांगितले.
ब्राण्टो स्कायलिफ्ट एफ ९० ची वैशिष्ट्ये
> ही नवीन गाडी फिनलंड येथून खरेदी केली आहे
> किंमत अंदाजे १५ कोटी
> या गाडीत मुख्य इंजिनासह पर्यायी पंपाची व्यवस्था
> मुख्य इंजिन बंद पडल्यास या पंपाद्वारे यंत्रणा कार्यान्वित ठेवता येते
> मुख्य इंजिन आणि पंप बंद पडल्यास विद्युत पुरवठ्याद्वारे यंत्रणा सुरू ठेवता येते