ईस्टर्न फ्री वेवर मद्यधुंद अवस्थेत गाडी चालवून दोघांच्या मृत्यूला कारणीभूत ठरलेली कॉर्पोरेट वकील जान्हवी गडकरला अखेर ५८ दिवसांनी जामीन मंजूर केला आहे. ३० हजार रुपयांच्या जातमुचलक्यावर दंडाधिकाऱ्यांनी तिची सुटका केली आहे.
नऊ जून रोजी रात्री उशिरा ईस्टर्न फ्री वेवर जान्हवीच्या ऑडी कारनं टॅक्सीला धडक दिली होती. त्यात टॅक्सीचालक मोहम्मद हुसेन सय्यद आणि सलीम साबुवाला यांचा मृत्यू झाला होता, तर चौघेजण जखमी झाले होते. या अपघातानंतर लगेचच तिला अटक करण्यात आली होती. मद्यधुंद अवस्थेत असलेल्या जान्हवीनं सुमारे दहा किमीपर्यंत चुकीच्या दिशेनं गाडी चालवली होती. तिच्या रक्ताच्या नमुन्यांत निर्धारित प्रमाणाच्या चारपट अधिक मद्याचा अंश आढळला होता. त्यामुळे जान्हवीविरोधात सदोष मनुष्यवधाचा गुन्हा दाखल करण्यात आला आहे.
दहा जूनपासून कोठडीत असलेल्या जान्हवीनं दोनदा जामिनासाठी अर्ज केला होता. परंतु, तिचा गुन्हा अत्यंत गंभीर असल्याचं सांगत, कुर्ला कोर्टानं तो फेटाळून लावला होता. आज मात्र दंडाधिकाऱ्यांनी जान्हवीला जामीन मंजूर केला.
