मुंबईहून चेन्नईला जाणाऱ्या विमानात महिला प्रवाशाच्या पाठीमागे बसून पॉर्न क्लिप पाहणं मुंबईतील एका उद्योगपतीला महागात पडलं आहे. विमानात अश्लील क्लिप पाहिल्याप्रकरणी पोलिसांनी त्याला ताब्यात घेतलं, मात्र सदर महिलेने लेखी तक्रार नोंदवण्यास नकार दिल्यानं त्याला समज देऊन सोडून देण्यात आलं आहे. शनिवारी रात्री ही घटना घडली. रात्री १०.५५ ला विमानाने चेन्नईच्या दिशेने उड्डाण घेतलं. त्यावेळी या विमानात मडीपक्कम येथील एक महिला तिच्या मुलासोबत प्रवास करत होती. ही महिला आणि तिचा मुलगा विमानात पुढच्या सीटवर बसले होते. त्यांच्यामागे बसून हा उद्योगपती मोबाइलवर पॉर्न क्लिप पाहत होता. ‘मला दिसेल अशा पद्धतीने मोबाइल हातात धरून हा उद्योगपती पॉर्न क्लिप पाहत होता,’ असं या महिलेनं पोलिसांना सांगितलं.
उद्योगपतीचे हे चाळे लक्षात आल्यानंतर सदर महिलेने विमानातील क्रु सदस्यांकडे तक्रार केली. त्यानंतर विमानातील कर्मचाऱ्यांनी या उद्योगपतीला त्याची जागा बदलण्याची विनंती केली. मात्र त्याने ती फेटाळून लावली. विमानाच्या कॅप्टननेही संबंधित उद्योगपतीशी बोलून मार्ग काढण्याचा प्रयत्न केला. मात्र त्यालाही त्याने दाद दिली नाही. त्यानंतर सदर महिलेला आणि तिच्या मुलाला दुसऱ्या सीटवर शिफ्ट करण्यात आले. त्यानंतर कॅप्टनने ट्रॅफिक कंट्रोलला त्याबाबतची माहिती दिली आणि चेन्नई विमानतळावर त्याला सीआयएसएफ जवानांनी ताब्यात घेतले.
सीआयएसएफ जवानांनी ताब्यात घेतल्यानंतर या उद्योगपतीने महिलेची माफी मागितली. त्यामुळे या महिलेने त्याच्याविरोधात लेखी तक्रार न नोंदविता त्याला सक्त ताकीद देऊन सोडून देण्यास सांगितले. त्यामुळे त्याला सक्त ताकीद देऊन सोडण्यात आलं आहे.