कोरेगाव पार्क येथे स्पाच्या नावाखाली चालणाऱ्या वेश्या व्यवसायाचा सामाजिक सुरक्षा विभागाने छापा टाकून पर्दाफाश केला आहे. या ठिकाणच्या सुकन्या व इलुमी या दोन स्पावर कारवाई करून थायलंड येथील पाच महिलांची सुटका करण्यात आली आहे. स्पा चालविणारी व्यक्तीच थेट थायलंडमध्ये जाऊन या मुलींना भारतात पाठवित असल्याची माहिती तपासात समोर आली आहे.
सागर कैलास परदेशी (वय ३६, रा. कोंढवा) व केविन सॅमसंग सनी (३०, रा. भवानी पेठ), महेश नामदेव शिंदे (३१, रा. कोंढवा) अशी अटक करण्यात आलेल्यांची नावे आहेत. या प्रकरणी कोरेगाव पार्क पोलिस ठाण्यात गुन्हा दाखल करण्यात आला आहे. शहरातील वेश्या व्यवसाय व अवैध धंद्ये बंद करण्याचे आदेश देण्यात आले आहेत. तरीही काही ठिकाणी स्थानिक पोलिसांकडून याकडे दुर्लक्ष केले जात आहे. गुन्हे शाखेचे सहायक पोलिस आयुक्त भानुप्रताप बर्गे यांना माहिती मिळाली होती, की कोरेगाव पार्क लेन क्रमांक सहा व सातमधील स्पामध्ये वेश्या व्यवसाय सुरू आहे. त्यानुसार, सामाजिक सुरक्षा विभागाने बनावट ग्राहक पाठवून माहिती खातरजमा केली. या वेळी वेश्या व्यवसाय सुरू असल्याचे निष्पन्न झाले. बर्गे यांच्या मार्गदर्शनाखाली वरिष्ठ निरीक्षक मनीषा झेंडे, सहायक निरीक्षक अश्विनी जगताप, नितीन तेलंगे, राहुल सकट, शंकर संपते यांच्या पथकाने सुकन्या स्पावर छापा टाकला. या ठिकाणीवरून थायलंडमधील आलेल्या तीन महिलांची सुटका केली. या ठिकाणी व्यवस्थापक म्हणून काम करणाऱ्या परदेशी व सनी या दोघांना अटक केली. स्पामालक राहुल राठोड असल्याचे समोर आले. तो थायलंड येथे राहून परदेशातील मुलींना वेश्या व्यवसायासाठी भारतात पाठवित असल्याचे आढळून आले आहे. तसेच, कोरेगाव पार्क येथील लेन क्रमांक सहामधील इलुमी स्पावर छापा टाकला. या ठिकाणाहून देखील थायलंडच्या दोन महिलांची सुटका करण्यात आली. स्पा मॅनेजर महेश शिंदे, मालक रितेश जोगीन यांच्यावर गुन्हा दाखल करण्यात आला आहे. या प्रकरणी अधिक तपास सुरू आहे.
रिसेप्शनिस्ट म्हणून विद्यार्थिनी
कोरेगाव पार्क परिसरात वेश्या व्यवसाय सुरू असलेल्या स्पामध्ये रिसेप्शनिस्ट म्हणून चक्क विद्यार्थिनी असल्याचे आढळून आले आहे. त्या विद्यार्थिनींना आतमध्ये स्पाच्या नावाखाली वेश्या व्यवसाय सुरू असल्याची माहिती नव्हती. या मुली पुण्यात फॅशन डिझायनिंगचे शिक्षण घेत आहेत. त्यामुळे नोकरी करीत असलेल्या ठिकाणी नेमके काय चालते याची खात्री करूनच नोकरी करावी, असे अवाहन पोलिसांनी केले आहे.