ठाणे-कल्याण आणि कुर्ला-वाशी मार्गावर मध्य रेल्वेतर्फे ब्लॉक घोषित करण्यात आला आहे. रविवारी पश्चिम रेल्वेवरील ब्लॉक रद्द करण्यात आल्यामुळे सुट्टीच्या दिवशी कुटुंबीयांसह लोकलने प्रवास करणाऱ्या प्रवाशांना दिलासा मिळणार आहे. ब्लॉक काळात कल्याण स्थानकातील कसारा दिशेला असलेला जुना पादचारी पूल तोडण्यात येणार असल्यामुळे सीएसएमटीकडे जाणाऱ्या आणि सीएसएमटीहून येणाऱ्या ट्रेनच्या वेळेवर परिणाम होणार आहे.
मध्य रेल्वे
स्थानक : ठाणे-कल्याण
वेळ : स. १०.३० ते दु. ४
मार्ग : डाऊन धीमा
परिणाम : ब्लॉक काळातील डाऊन धीम्या मार्गावरील फेऱ्या मुलुंड आणि कल्याणदरम्यान जलद डाऊन मार्गावर वळवण्यात येईल. ठाणे, दिवा आणि डोंबिवली या मार्गावर लोकल थांबणार आहे. ब्लॉक काळात अप मार्गावरील लोकल सुमारे १० ते १५ मिनिटे आणि डाऊन मार्गावरील लोकल सुमारे २० मिनिटे विलंबाने धावणार आहे.
हार्बर रेल्वे
स्थानक : कुर्ला-वाशी
वेळ : स. ११.१० ते दु. ३.४०
मार्ग : अप आणि डाऊन मार्ग
परिणाम : ब्लॉक काळात सीएसएमटी ते वाशी/बेलापूर/पनवेल आणि पनवेल/बेलापूर/वाशी ते सीएसएमटी या मार्गावरील लोकल फेऱ्या रद्द राहणार आहेत. ब्लॉक काळात सीएसएमटी ते कुर्ला आणि पनवेल-वाशी मार्गावर विशेष फेऱ्या चालवण्यात येणार आहे.
कल्याण पादचारी पूल पाडकाम
१९७४ साली उभारण्यात आलेला कल्याण स्थानकातील कसारा दिशेकडील पूल अखेर जमीनदोस्त करण्याचा निर्णय मध्य रेल्वेने घेतला आहे. पूर्व-पश्चिम जोडणाऱ्या पूलाचे काम रविवारी सकाळी १०.३० ते दुपारी ५ या काळात करण्यात येणार आहे. सद्यस्थितीत कल्याण स्थानकात एकूण ४ पादचारी पूल आहेत.