बदलापूर पूर्व येथे एका मद्यपी पतीने आपली पत्नी आणि दोन लहान मुलांवर शीतपेयातून विषप्रयोग केल्याची धक्कादायक घटना समोर आली आहे. यात पत्नीचा उपचारादरम्यान मृत्यू झाला असून दोन मुले अत्यवस्थ आहेत. त्यांच्यावर मुंबईतील वाडिया रुग्णायलात उपचार सुरू आहेत. आरोपी पतीचा पोलिस तपास घेत आहेत.
शिरगाव संभाजी नगर येथे राहणाऱ्या संभाजी भोसले याला दारूचे व्यसन होते. अंबरनाथच्या औद्योगिक वसाहतीतील एका खासगी कंपनीत कामाला होता. दारूच्या व्यसनामुळे तो कर्जातही बुडाला होता. या नैराश्यग्रस्त भावनेतून त्याचे पत्नीसोबत सतत वाद होत होते. याच वादातून संभाजी याने १५ मार्च रोजी आपली पत्नी लक्ष्मी आणि सहा आणि सात वर्षांच्या दोन मुलांवर शीतपेयातून विषप्रयोग केला. त्यानंतर तो पसार झाला. दोघा लहान मुलांना त्रास होत असल्याने मुलांच्या आईने त्यांना प्रथम बदलापूर ग्रामीण रुग्णालयात दाखल केले. मात्र ते बरे होत नसल्याने बदलापुरातील खासगी रुग्णालयात दाखल केले. याच दरम्यान मुलांच्या आईचीही प्रकृती बिघडल्याने त्यांना मुंबईतील केईएम रुग्णालय येथे दाखल करण्यात आले होते. मात्र उपचारादरम्यान बुधवारी लक्ष्मी भोसले (३० ) हिचा मृत्यू झाला आहे. तर मुलांची प्रकृती अधिक गंभीर झाल्याने त्यांना मुंबईतील वाडिया रुग्णालयात उपचारासाठी दाखल करण्यात आल्याची माहिती अंबरनाथ विभागाचे सहाय्यक पोलिस आयुक्त सुनील पाटील यांनी दिली. लक्ष्मी भोसले हिचे वडील चंद्रकांत आंबेकर यांच्या फिर्यादीवरून संभाजी भोसले यांच्या विरोधात गुन्हे दाखल करण्यात आले आहेत. या प्रकारानंतर संभाजी भोसले फरार असून त्याच्या शोधासाठी तीन वेगवेगळी पथके स्थापन करण्यात आली आहे.