होळी, धुळवड आनंदात साजरी करा, मात्र रंगाचा ‘बेरंग’ केल्यास पोलिस कारवाईला सामोरे जावे लागेल, असा सज्जड इशारा मुंबई पोलिसांनी दिला आहे. मनाविरुद्ध कुणावर रंग किंवा फुगे फेकण्यास मनाई करण्यात आली आहे. तसेच सार्वजनिक ठिकाणी आक्षेपार्ह घोषणा, गाणी गाण्यास बंदी लादण्यात आली असून तसे आदेश मुंबई पोलिसांच्या वतीने जारी करण्यात आले आहे. या आदेशाचे उल्लंघन केल्यास अटकेची कारवाई होऊ शकते, असे मुंबई पोलिसांच्या वतीने बजावण्यात आले आहे.
मुंबईमध्ये होळी आणि धुळवड मोठ्या प्रमाणात साजरे केले जाते. चाळ, इमारती, गृहनिर्माण सोसायट्या याचबरोबर रस्त्यावर, चौपाट्या तसेच सार्वजनिक ठिकाणी धुळवड साजरी करण्यासाठी गर्दी होते. या उत्साहाला गालबोट लागू नये, जातीय हिंसा वा कायदा आणि सुव्यवस्था स्थितीतील बिघाड टाळण्यासाठी मुंबई पोलिसांनी नागरिकांना मार्गदर्शक सूचना जारी केल्या आहेत. सार्वजनिक ठिकाणी कुणाच्या भावना दुखावतील अशा आक्षेपार्ह घोषणा देऊ नयेत तसेच अशा प्रकारची गाणी गाऊ नयेत, पादचारी तसेच इतर कोणावर संमतीविना रंग, पाण्याने किंवा रंगाने भरलेले फुगे टाकू नयेत, प्रतिष्ठा, संस्कृती, नैतिकचे भान राखावे, असे पोलिसांनी म्हटले आहे. यासंदर्भात तक्रार केल्यास अगर पोलिसांच्या या आदेशाचे उल्लंघन करताना कुणी आढळल्यास भादंवि कलम १८८ अंतर्गत संबंधित व्यक्तीवर कारवाई होऊ शकते. हा दखलपात्र आणि जामीनपात्र गुन्हा असून अटक झाल्यास महिनाभराची शिक्षाही होऊ शकते. पोलिसांनी हे आदेश १९ ते २२ मार्च या कालावधीसाठी जारी केले आहेत. त्यामुळे होळी, धुळवड साजरी करताना कायद्याचे उल्लंघन होणार नाही, याचे भान ठेवा असे आवाहन मुंबई पोलिसांच्या वतीने करण्यात आले आहे.
बाजारात रंगत
राज्यामध्ये कोरडी होळी आणि पर्यावरणपूरक रंगांनी होळी खेळण्याचे आवाहन गेली अनेक वर्षे करण्यात येत आहे. या पार्श्वभूमीवर शाळांमध्येही विद्यार्थ्यांना होळी जपून खेळण्यास सांगितली जात आहे. मात्र आता बाजारात आलेल्या पिचकाऱ्या आणि रंगांची उधळण लहानमोठ्यांना भुरळ घालत आहे. रविवारी बाजारामध्ये पिचकारी खरेदीला रंग चढला होता. गेले १५ दिवस विविधरंगी आणि विविध आकारांच्या पिचकाऱ्या बाजारामध्ये दाखल झाल्या आहेत. मात्र धुळवडीच्या अवघे काही दिवस आधी या खरेदीला जोर चढतो. रंगांची खरेदी तर सर्वसाधारणपणे आदल्या दोन दिवसांमध्ये होते. बाजारात सध्या रासायनिक रंगच दिसत आहेत. नैसर्गिक रंग अजूनही बाजारात मोठ्या प्रमाणात विकले जात नाहीत, असेच चित्र आहे.