बेस्टच्या १० जुनाट बसेसचे रुपांतरण चालत्या फिरत्या टॉयलेट्समध्ये करण्याचा प्रस्ताव बीएमसीमध्ये शिवडीचे नगरसेवक सचिन पडवळ यांनी माडंला आहे .या प्रस्तावाचा महापालिकेत सकारात्मक रीतीने विचार केला जात असून यावर किती खर्च येईल हे मात्र स्पष्ट झालेलं नाही.
बेस्टचा व्यापार मोठ्या प्रमाणात तोट्यात जातो आहे. बेस्टच्या अनेक जुन्या बसेसचा वापर केला जात नसल्यामुळे तशाच पडून आहेत.या बसेस खाजगी कंपन्या विकत घेण्यासही नकार देत आहेत. तेव्हा या बसेसचे रुपांतर मोबाइल टॉयलेट्समध्ये करण्यात यावे असा प्रस्ताव मांडण्यात आला आहे. मुंबईमध्ये दररोज वाहतूक कोंडी होत असते. यामुळे कोंडीत अडकलेल्या चालकांना, प्रवाशांना शौचास जाता येत नाही. तेव्हा त्यांच्या सोयीसाठी बेस्टच्या या बसेसचे रुपांतर चालत्या-फिरत्या शौचालयांमध्ये करण्यात यावे अशी मागणी नगरसेवक पडवळ यांनी केली आहे. या बसेसमध्ये पुरूष आणि स्त्रियांसाठी स्वतंत्र शौचालयांची व्यवस्था करण्यात यावी असंही पडवळ यांचं म्हणणं आहे. मुंबई महानगरपालिकेने या प्रस्तावाला सकारात्मक प्रतिक्रिया दिली असून कंत्राटी तत्वावर ही शौचालय चालवण्यास देण्याचा विचार केला जातो आहे. एक बसला शौचालयात रुपांतरित करण्यासाठी कमीतकमी ३ लाख रुपये खर्च येऊ शकतो. हा सगळा खर्च कसा हाताळायचा याचा विचार केला जातो आहे. दरम्यान महापालिकेतील विरोधी पक्षनेते रवी राजा यांनी मात्र या प्रस्तावामुळे वायफळ खर्च होईल अशी भूमिका मांडली आहे. त्यापेक्षा रस्तोरस्ती हाय क्लास टॉयलेट्स उभारण्यात यावे अशी मागणी त्यांनी केली आहे.
आता या प्रस्तावावर मुंबई महापालिका अंतिम मोहोर कधी लावते हे पाहणं महत्त्वाचं ठरणार आहे.