घरगुती वापराचा पाइप गॅस व वाहनांसाठी वापरण्यात येणाऱ्या सीएनजीच्या दरांमध्ये देशभरात एक एप्रिलपासून सुमारे १० टक्के वाढ होण्याची शक्यता आहे. एका सरकारी सूत्राने ही माहिती दिली. मुंबईत बुधवारी सीएनजीचे दर प्रतिकिलो ४४.२२ रुपये होते. तर, पाइप गॅसचा दर सध्या २९ रुपये (प्रति स्टॅण्डर्ड क्युबिक मीटर) आहे. या दोन्ही दरात १० टक्क्यांनी वाढ झाल्यास हे दर अनुक्रमे ४८.६४ व ३२ रुपये होण्याची शक्यता आहे.
देशांतर्गत उत्पादित होणाऱ्या नैसर्गिक वायूच्या दरांमध्ये दरवर्षी एक ऑक्टोबर व एक एप्रिलला वाढ केली जाते. यासाठी अमेरिका, रशिया, कॅनडा आदी नैसर्गिक वायू उत्पादनांत अग्रेसर असणाऱ्या देशांतील सरासरी दरांचा आधार घेतला जातो. एक एप्रिलपासून देशभरात लागू होणाऱ्या सीएनजी, घरगुती पाइप गॅस व अन्य गॅसदरांसाठी अमेरिका, रशिया, कॅनडा आदी देशांत एक जानेवारी ते ३१ डिसेंबर २०१८ या कालावधीत झालेली गॅसदरवाढ विचारात घेतली जाणार आहे. या देशांत गॅसदरांत गेल्या वर्षी सरासरी १० टक्के वाढ झाल्याचे या सरकारी सूत्राने सांगितले. त्यामुळे एक एप्रिलपासून देशांतर्गत गॅसदरांत त्याच प्रमाणात वाढ होण्याची शक्यता आहे. एक एप्रिलला ही दरवाढ झाल्यास ती सलग चौथी दरवाढ ठरेल. गेल्या वर्षी एक ऑक्टोबरलादेखील गॅसदरांत १० टक्क्यांनी वाढ झाली होती.
कंपन्यांना लाभ
नैसर्गिक वायू उत्पादनामध्ये आघाडीवर असणाऱ्या ओएनजीसी, रिलायन्स इंडस्ट्रिज आदी कंपन्यांना या दरवाढीमुळे लाभ होईल. एक एप्रिलपासून या गॅसदरांत १० टक्के वाढ झाल्यास हा दर प्रति दशलक्ष ब्रिटिश थर्मल युनिट ३.७२ अमेरिकी डॉलरवर पोहोचेल. दुर्गम भागांतील वायूक्षेत्रांमधून उत्पादित होणाऱ्या गॅससाठी हा दर नऊ अमेरिकी डॉलर होण्याची शक्यता आहे.