सर्वसामान्यांची कार असे बिरुद लाभलेली टाटा समूहाची नॅनो लवकरच बंद होण्याची शक्यता आहे. जानेवारीमध्ये या कंपनीने एकाही कारचे उत्पादन केले नाही. तसेच, महिनाभरात एकही नॅनो कार विकली गेली नाही. यामुळे ही कंपनी बंद होणार या चर्चेला पुष्टी मिळाली आहे. जानेवारी २०१८मध्ये नॅनोने ८३ कारचे उत्पादन केले होते. तर, ६२ कारची विक्री झाली होती.
नॅनोमध्ये आणखी आर्थिक गुंतवणूक करण्यास कंपनी उत्सुक नसून एप्रिल २०२०पासून तिचे उत्पादन थांबवण्यात येईल, असे नॅनोच्या वरिष्ठ अधिकाऱ्यांनी अलीकडेच सांगितले होते. मात्र या कारसंबंधी सध्याचे आर्थिक गणित पहाता ती त्यापूर्वीच गाशा गुंडाळेल, अशी चिन्हे आहेत. दुचाकी व चारचाकी वाहनांतून होणाऱ्या कार्बन उत्सर्जनाच्या बाबतीत बीएस-सहा अंतर्गत केंद्र सरकारने कठोर धोरण आखले आहे. याशिवाय, कारमधील सुरक्षात्मक उपाययोजनांसंबंधी नवी नियमावलीही प्रस्तावित आहे. या दोहोंच्या पूर्ततेसाठी नॅनोच्या अंतर्गत रचनेत बरेच बदल करावे लागतील. बाजारात मागणी नसताना हे बदल केल्यास कंपनी आणखी आर्थिक गोत्यात जाईल. त्यामुळे नॅनोचे उत्पादन वेळीच थांबवणे व्यवहार्य ठरेल, या निष्कर्षापर्यंत टाटा आले आहेत, असे समजते.
कोणत्याही वाहनाचे उत्पादन हे बाजारातील मागणीनुसारच होत असते. मात्र केवळ एका महिन्यातील आकडेवारीच्या आधारे काही मत नोंदवणे योग्य ठरणार नाही, अशी प्रतिक्रिया या कंपनीच्या प्रवक्त्याने व्यक्त केली.
हेतू चांगला परंतु…
दुचाकीवरून गैरसोयीचा प्रवास करणाऱ्या मध्यमवर्गीय कुटुंबाला परवडेल अशी कार उत्पादित करावी या ध्येयाने टाटा समूहाचे प्रमुख रतन टाटा यांनी या कारनिर्मितीची कल्पना मांडली होती. प. बंगालमधील सिंगूर येथे या कंपनीच्या प्रकल्पाला विरोध झाल्यानंतर ती गुजरातमधील साणंद येथे स्थानांतरित करण्यात आली. जानेवारी २००८च्या ऑटो एक्स्पोमध्ये नॅनोचे प्रथम सादरीकरण झाले होते. मार्च २००९मध्ये ती बाजारात दाखल झाली. या कारला सुरुवातीला चांगला प्रतिसाद मिळाला. मात्र एक लाख या निर्धारित किंमतीपेक्षा अधिक पैसे मोजावे लागत असल्याने ती स्पर्धेतून मागे पडली.
टाटांची कबुली
देशातील सर्वांत स्वस्त कार या प्रकारे या कारची जाहिरात करण्याचा आमचा निर्णय चुकीचा ठरला, अशी कबुली रतन टाटा यांनी यापूर्वीच दिली आहे.