एरवी दागिने, पैसे, मौल्यवान वस्तू चोरीला जाण्याच्या घटना अनेक घडतात. पण चिकमंळुरुत मात्र तब्बल सव्वा लाखाचे गायीचे शेण चोरीला गेलं आहे. ही शेणाची चोरी कोणत्या सराईत चोराने नाही तर एका पशुपालन विभागातल्या एका सरकारी कर्मचाऱ्याने केली असून पोलिसांनी त्याला अटकही केली आहे.
ही घटना चिकमंगळुरू जिल्ह्यातील बिरूर येथे घडली आहे. पोलिसांनी दिलेल्या माहितीनुसार स्थानिक पशुपालन विभागाच्या अमृतमहल स्टॉकमधून अचानक ३५-४० किलो शेण नाहीसे झाले. पशुपालन विभागाच्या संचालकांनी शेण चोरीला गेल्याची तक्रार बिरूर पोलीस ठाण्यात दाखल केली होती. पोलिसांनी तपास केला असता हे शेण अमृतमहलच्याच एका निरीक्षकानेच चोरल्याची बाब स्पष्ट झाली आहे. या निरीक्षकाने एका मित्राच्या शेतावर सारे शेण लपवून ठेवले होते. या शेणाचा वापर प्रामुख्याने शेतातील खतासाठी होतो. तेव्हा हे शेण विकून रग्गड पैसे कमवण्याचा यांचा विचार होता.
पोलिसांनी या दोन्ही शेणचोरांना अटक केली असून पुढील चौकशी सुरू आहे. पण पैशांसाठी चक्क गायीच्या शेणाची चोरी केल्यामुळे अचंबा व्यक्त केला जातो आहे.