सर्वोच्च न्यायालयाने आयपीसीचे कलम ३७७ रद्द केल्यानंतर मुंबईतील पहिला समलैंगिक विवाह सोहळा मुंबईतील एका पंचतारांकित हॉटेलमध्ये पार पडला आहे. रेनबो व्हॉइस या संस्थेचे संस्थापक विनोद फिलीप ( ४३) आणि विन्सेंट ( ४७) या दोघांचा विवाह सोहळा पार पडला असून या लग्नात मुंबईच्या एलजीबीटी समुहातील अनेक दिग्गज सहभागी झाले आहेत.
ज्या हॉटेलमध्ये हे लग्न पार पडलं त्या हॉटेलचे व्यवस्थापकही या लग्नात सामील झाले. विनोद फिलीप हा दक्षिण भारतातील एका अत्यंत कट्टर ख्रिस्ती घरात जन्मला आला आहे तर विन्सेंट फ्रान्सचा आहे. दोघांची भेट पॅरिसमध्ये एका डेटिंग अॅपच्या माध्यमातून झाली होती. नंतर सहा महिने डेटिंग केल्यावर आयुष्य सोबत घालवायचा निर्णय त्यांनी घेतला होता. विनोदने जेव्हा विन्सेंटबद्दल घरी सांगितले होतं तेव्हा त्याला घरातून प्रचंड विरोध झाला होता. पण नंतर त्यांनी विन्सेंटला स्वीकारलं होतं. डिसेंबर २०१८मध्ये दोघंही फ्रान्समध्ये विवाहबद्ध झाले होते. पण विनोदने त्याच्या आयुष्यातील काही वर्षं मुंबईत व्यतीत केली होती. त्यामुळे दोघांनीही मुंबईत येऊन समलैंगिकांसाठी रेनबो व्हॉइस संस्थेच्या माध्यमातून काम करण्यास सुरुवात केली. भारतात समलैंगिक संबंधांना कायदेशीर मान्यता मिळाल्यानंतर विन्सेंट आणि विनोदने मुंबईत पुन्हा एकदा विवाहबद्ध होण्याचा निर्णय घेतला. मुंबईतील हमसफर ट्रस्टचे अनेक सदस्य या विवाहाला उपस्थित होते.
भारतातला पहिला समलैंगिक विवाह सोहळा १९८४मध्ये पार पडला होता.