एका २५ वर्षीय महिलेवर बलात्कार केल्याच्या आरोपावरून एका १९ वर्षीय तरुणीला दिल्लीतील सीमापुरी पोलिसांनी अटक केली आहे. सेक्स टॉयचा वापर करत पीडित महिलेवर बलात्कार केल्याचा या तरुणीवर आरोप आहे. कोर्टाने आरोपी तरुणीला न्यायालयीन कोठडी ठोठावत तिची रवानगी तिहार कारागृहात केली आहे.पीडित महिलेवर सामूहिक बलात्कार झाल्याचे हे प्रकरण असून ते गेल्या वर्षी सप्टेंबरमध्ये उघड झाले होते. या प्रकरणी सीमापुरी पोलिसांनी ३ युवकांविरोधात गु्न्हा दाखल केला होता. त्यावेळी या प्रकरणात सहभागी असलेल्या या १९ वर्षीय तरुणीवर पोलिसांनी गुन्हा दाखल केला नव्हता. सुप्रीम कोर्टाने समलैंगितेला (कलम ३७७) गुन्ह्याच्या कक्षेबाहेर ठेवल्यामुळे तरुणीवर गुन्हा दाखल करता येत नसल्याचं पोलिसांचं म्हणणं होतं.
१९ वर्षीय तरुणीने आपल्यावर अनेकदा बलात्कार केले, शिवाय अनेकदा मारहाणही केली असा पीडित महिलेचा आरोप आहे. याबाबत मिळालेल्या माहितीनुसार, कडकड्डूमा कोर्टात आरोपी तरुणीचा जबाब नोंदवण्यात आला. त्यानंतर जबाबाच्या आधारे तिला अटक करण्यात आली.
याबाबत मिळालेल्या अधिक माहितीनुसार, पीडित महिला एका बिझनेस प्लानमध्ये छोटे गुंतवणूकदार मिळवण्याचे काम करत असे. त्या निमित्ताने ती लोकांना भेटत असे. याच दरम्यान तिची भेट रोहित आणि राहुल यांच्याशी झाली. या दोघांनी पीडित महिलेस दिलशाद कॉलनीमधील एका अपार्टमेंटमध्ये नेले आणि तिथेच तिच्यावर बलात्कार केला. या प्रसंगाचा व्हिडिओ तयार करून त्यांनी पीडितेला ब्लॅकमेल करण्याचाही प्रयत्न केला. यात आरोपी १९ वर्षीय तरुणी पीडित महिलेवर पहारा ठेवण्याचे काम करत असे. त्याचवेळी ती सेक्स टॉयचा वापर करत पीडित महिलेसोबत संबंध ठेवत असे.
या प्रकरणी पोलिसांनी तीन पुरुष आरोपींना अटक केली होती. मात्र, या १९ वर्षीय तरुणीला पोलिसांनी सोडून दिले होते. आता या तरुणीलाही बलात्काराच्या आरोपाखाली कलम ३७७ अंतर्गत (समलैंगितका) अटक करण्यात आले आहे. शाहदरा जिल्ह्यातील पोलिसांनी या वृत्ताला दुजोरा दिला आहे.