बारावीची लेखी परीक्षा तोंडावर येऊन ठेपली असतानाच राज्यात काही ठिकाणी ऑनलाइन पद्धतीने उपलब्ध झालेल्या हॉल तिकिटांवर मोठ्या प्रमाणावर चुका आढळून आल्याने विद्यार्थी गोंधळले आहेत. दरम्यान, नाशिक विभागात अशा चुका नसल्याचा दावा करताना एसएससी व एचएससी बोर्डाच्या अधिकाऱ्यांनी शुक्रवारी सायंकाळी उशीरापर्यंत एकही तक्रार नाशिक कार्यालयात दाखल झाली नसल्याची माहिती दिली. तरीही चूका आढळल्यास विद्यार्थ्यांनी बोर्डाच्या कार्यालयाशी संपर्क साधावा, असे आवाहन बोर्डाच्या अधिकाऱ्यांनी केले आहे.
यंदापासून राज्य माध्यमिक आणि उच्च माध्यमिक शिक्षण मंडळाने या परीक्षार्थींना ऑनलाइन हॉलतिकीट देण्याचा निर्णय घेतला आहे. मात्र, यातील विद्यार्थ्याचे नाव, विषय, परीक्षा माध्यम आदींच्या चुका आढळून आल्याने विद्यार्थ्यांनी राज्य मंडळाकडे धाव घेतली होती. या पार्श्वभूमीवर नाशिक विभागात मात्र चुका झाल्याचे अद्याप निदर्शनाला आलेले नाही. तरीही असे प्रकार विद्यार्थी-पालकांच्या निदर्शनास आल्यास त्वरीत बोर्डास कळवावे, असे आवाहन विभागीय सचिव नितीन उपासनी यांनी केले आहे. हॉल तिकिट तयार करण्याच्या प्रक्रियेत विद्यार्थ्याने अचूक अर्ज सादर केल्यानंतर प्रि लिस्ट तयार करण्यात येऊन त्यातील त्रुटी सुधारल्या जातात त्यानंतर अंतिम हॉल तिकीट प्रसिद्ध केले जाते. हॉल तिकिटांसाठी शाळा किंवा ज्युनिअर कॉलेजांनी कुठल्याही प्रकारचे शुल्क आकारू नये, अशा सूचनाही राज्य शिक्षण मंडळाच्या वतीने शाळा व कॉलेजांना दिल्या आहेत.