डहाणू, तलासरी तालुक्यासह परिसराला शुक्रवारी दिवसभरात भूकंपाचे सहा धक्के बसले. शुक्रवारी दुपारी २.०६ वाजता बसलेला धक्का आजपर्यंतचा सर्वात मोठा ४.१ रिश्टर क्षमतेचा आहे. सरकारी पातळीवर याबाबत अनास्था असून तहसीलदारांव्यतिरिक्त कोणीही येथे पोहोचलेले नाही.
भूकंपाच्या तीव्रतेत वाढ झाल्याने लोकांची चिंता वाढली असून ग्रामस्थ घराबाहेर रात्र जागून काढत आहेत. रात्रभरात चार धक्के बसल्यानंतर शुक्रवारची पहाट भूकंपाच्या धक्क्यानेच सुरू झाली. सकाळी बसलेल्या धक्क्याची तीव्रता जास्त असल्याने या भागातील आठ ते दहा घरांना तडे जाऊन ती कोसळण्याच्या स्थितीत आली आहेत. या घरांचे पंचनामे करण्यासाठी तलासरीच्या तहसीलदार स्वाती घोंगडे यांनी तलाठी व मंडळ अधिकारी यांना पाठविले असून त्या स्वतः देखील या भागाची पाहणी करीत आहेत.
पहिला धक्का शुक्रवारी सकाळी ६.५८ वाजता, ३.३ रिश्टर तीव्रतेचा बसला होता. दुसरा धक्का सकाळी १०.०३ वाजता, ३.५ रिश्टर क्षमतेचा धक्का तुलनेने अधिक होता. तिसरा धक्का लगेचच सकाळी १०.२९ वाजता ३.० रिश्टर क्षमतेचा बसला. त्यानंतर दुपारी २.०६ वाजता चौथा धक्का बसला. या सर्व भूकंपांचा केंद्रबिंदू आणि याआधीच्या भूकंपाचे केंद्रबिंदू समान असल्याचे आढळले आहे.
या परिसरात वारंवार बसणाऱ्या भूकंप धक्क्यांमुळे नागरिकांमध्ये घबराटीचे वातावरण आहे, मात्र शासकीय यंत्रणा अद्यापही कामाला लागलेली नाही. डहाणू, तलासरी भागात भूकंपमापक यंत्रे बसविण्यात आली आहेत. तरीही शासकीय यंत्रणेकडून दिल्या जाणाऱ्या आकडेवारीबाबत जनतेच्या मनात संभ्रम आहे.
दोन वर्षीय चिमुकलीचा मृत्यू
डहाणू तालुक्यातील हळदपाडा येथील वैभवी रमेश भुयाल ही दुपारी घराजवळ बांधावर खेळत असताना भूकंपाचा धक्का बसला. त्यामुळे घाबरून पळत असताना ती दगडाला ठेच लागून पडली. दगडावर डोके आपटल्याने तिच्या नाका-तोंडातून रक्त येऊ लागले. तिच्या घरच्यांनी तिला तातडीने ग्रामीण रुग्णालयात नेले, परंतु उपचारापूर्वीच तिचा मृत्यू झाला.