परदेशातील नागरिकांना फोन करून त्यांना ‘ऑनलाइन’ गंडा घालणाऱ्या खराडी परिसरातील बोगस कॉल सेंटरवर गुन्हे शाखेच्या पोलिसांनी छापा टाकला. या ठिकाणाहून पाच जणांस अटक केली आहे. अमेरिका, ऑस्ट्रेलिया व कॅनडातील नागरिकांना लाखो रुपयांचा आरोपींनी ऑनलाइन गंडा घातल्याचे समोर आले आहे. याच पद्धतीने फसवणूक करणारी जयपूर, अहमदाबाद, दिल्ली परिसरात बोगस कॉल सेंटर सुरू असल्याची माहिती चौकशीत समोर आली आहे.
शालीन विपीनभाई पंचाल, धनंजय ऊर्फ बिट्टु बिपीनभाई पंचाल (वय २३, रा. दोघेही- नारायणपुरा, अहमदाबाद), निसर्ग सुभाषभाई पंडित (वय २८, रा. विमाननगर), मितेश गोकुळ ठक्कर (वय २४, रा. विमानतळ, मूळ-गुजरात), ऐश्वर्य मोहन भारद्वाज (वय २७, रा. भाईंदर इस्ट, पालघर) अशी अटक केलेल्यांची नावे आहेत.
खराडी-चंदननगर भागातील एका कॉलसेंटरमधून परदेशातील नागरिकांची ऑनलाइन फसवणूक करण्याचे प्रकार केले जात असल्याची माहिती सहायक पोलिस आयुक्त भानुप्रताप बर्गे यांना मिळाली होती. त्यानुसार गुन्हे शाखेच्या प्रभारी अतिरिक्त पोलिस आयुक्त ज्योतीप्रिया सिंह, उपायुक्त शिरीष सरदेशपांडे, बर्गे यांच्या मार्गदर्शनाखाली पोलिस निरीक्षक संतोष बर्गे, गजानन पवार यांच्या पथकाने पहाटे प्राइड आयकॉन सोसायटीत असलेल्या सदनिकेवर छापा टाकण्यात आला. त्या ठिकाणाहून पोलिसांनी २५ हार्ड डिस्क, १४ लॅपटॉप, आयट्युन कार्ड जप्त केली आहेत. या ठिकाणी पोलिसांना अमेरिका, ऑस्ट्रेलिया आणि कॅनडातील लाखो नागरिकांचा डेटा आरोपींकडे आढळून आला आहे. या ठिकाणी १२ व्यक्ती काम करताना आढळून आल्या आहेत. परंतु, त्यांना या फसवणुकीची काहीही माहिती नव्हती. उत्तम इंग्रजी बोलणाऱ्या व्यक्तींना हेरून नोकरीला घेण्यात येई. त्यांना बोलण्याचे प्रशिक्षण देऊन काय बोलायचे हे लिहून दिलेले असे. त्यावरून कामाला ठेवलेले तरुण बोलत असत, अशी माहिती तपासात समोर आली आहे.
बिटकॉइनमधून आरोपींना पैसे
गुजरात येथे पूर्वी हे बनावट कॉलसेंटर सुरू होते. दीड वर्षापूर्वी आरोपींनी पुण्यात हे कॉल सेंटर सुरू केले. नोव्हेंबरपासून कारवाई केलेल्या ठिकाणी हे कॉल सेंटर सुरू केले होते. या ठिकाणाहून अमेरिका व इतर देशातील नागरिकांना फोन केले जात असत. त्यांना तुमच्या सिक्युरिटी कार्डचा गैरवापर झाला असून, दंड भरावा लागेल असे सांगितले जात असे. त्यानंतर तडजोड म्हणून आयट्युन्सची कुपन घ्यायला सांगत असत. ती स्क्रॅच करून त्यावरील क्रमांक विचारून घेतला जात असे. तो क्रमांक चीनमधील त्यांच्या व्यक्तीला पाठवून त्याचे पैसे खात्यावर वर्ग केले जात असत. चीनमधील व्यक्ती ४० टक्के रक्कम ठेऊन साठ टक्के रक्कम बीटकॉइनच्या माध्यमातून आरोपींना पाठवत होते, अशी माहिती तपासात समोर आली आहे.