बेस्ट कर्मचाऱ्यांनी पुकारलेल्या नऊ दिवसांच्या संप कालावधीत बसपासधारकांचे झालेले नुकसान भरून काढण्याचा महत्त्वाचा निर्णय बेस्ट उपक्रमाने घेतला आहे. ८ ते १६ जानेवारीमध्ये बेस्टचे कर्मचारी संपावर गेल्याने बसच्या पासधारकांना या कालावधीत सेवेचा फायदा घेता आला नाही. ही बाब लक्षात घेत बेस्ट उपक्रमाने बसपासच्या पुढील नूतनीकरणावेळी बसपास वैधता कालावधी वाढवण्याची घोषणा केली आहे.
बेस्टच्या ३० हजार कर्मचाऱ्यांच्या संपामुळे तिकीटधारकांप्रमाणेच बसपासधारकांना बेस्टमधून प्रवास करता आला नाही. सलग नऊ दिवस प्रवास न करू शकलेल्या आणि त्यातील शिल्लक राहिलेल्या दिवसांच्या कालावधीसाठी पास वाढवून मिळणार आहे. संपाच्या पहिल्या दिवशी आणि संप संपल्यानंतर सायंकाळनंतर सुरू झालेल्या सेवांमधून प्रवास केलेल्या पासधारकांचा कालावधी त्यातून वगळला जाईल. त्याचवेळी संपात सर्व नऊ दिवस प्रवास न केलेल्या बसपासधारकांना संपूर्ण कालावधीसाठी पासचा कालावधी वाढवून मिळेल. त्यासाठी बसपासच्या पुढील नूतनीकरणावेळी बसपासचा वैधता कालावधी वाढवला जाणार आहे. ही सुविधा बेस्टच्या बसपास वितरण केंद्रांवर उपलब्ध करण्यात आली आहे.