बँकिंग क्षेत्रात अनेक वर्षे आपला दबदबा राखणाऱ्या आणि नंतर आम आदमी पक्षाची कास धरून लोकसभा निवडणुकीत नशीब आजमवणाऱ्या मीरा सन्याल यांचे आज मुंबईतील कुलाबा येथील निवासस्थानी निधन झाले. त्या ५७ वर्षांच्या होत्या.
मीरा सन्याल गेल्या दोन वर्षांपासून कर्करोगाने त्रस्त होत्या आणि त्यातच आज त्यांचे निधन झाले. रात्री ८ वाजता त्यांची प्राणज्योत मालवली.
मीरा सन्याल २०१४च्या लोकसभा निवडणुकीत दक्षिण मुंबई मतदारसंघातून आपच्या तिकिटावर लढल्या होत्या. या निवडणुकीत त्यांचा पराभव झाला होता. आपमध्ये प्रवेश करण्याआधी सन्याल यांनी बँकिंग क्षेत्रात ३० वर्षांची प्रदीर्घ सेवा दिली. रॉयल बँक ऑफ स्कॉटलंडच्या भारतातील मुख्य कार्यकारी अधिकारी म्हणून मीरा सन्याल यांनी यशस्वीपणे धुरा वाहिली.
दिल्लीचे उपमुख्यमंत्री मनीष सिसोदिया यांनी सन्याल यांच्या निधनाबाबत दुःख व्यक्त केलं आहे. सन्याल यांच्या निधनानं आपण एक चांगला अर्थतज्ज्ञ आणि चांगलं व्यक्तिमत्त्व गमावलं, असं ट्विट सिसोदिया यांनी केलं आहे. सन्याल यांचे निवडणुकीतील प्रतिस्पर्धी, शिवसेना उपनेते अरविंद सावंत यांनीही सन्याल यांच्या निधनावर तीव्र शोक व्यक्त केला.