सुरक्षारक्षक किंवा नोकर ठेवताना त्यांची पोलिस पडताळणी करून घ्या. त्याचे पूर्ण नाव, पत्ता, फोटो या गोष्टी घेऊन ठेवा, असे आवाहन पोलिसांकडून वारंवार केले जाते. पण, नागरिकांकडून या गोष्टींची दक्षता घेतली जात नसल्याचे दिसून आले आहे. त्यामुळे सुरक्षारक्षक म्हणून काम करणाऱ्यांनी मालक घरी नसताना कोट्यावधी रुपयांच्या घरफोड्या केल्याचे समोर आले आहे. या गुन्ह्यांतील बहुतांश सुरक्षारक्षक नेपाळी किंवा उत्तर भारयीय असल्याचे आढळून आले आहे.
खडकी येथील एका नामांकित वकिलाच्या बंगल्यात ठेवलेल्या सुरक्षारक्षकानेच ३५ लाखांची घरफोडी केल्याचा प्रकार नोव्हेंबर महिन्यात घडला होता. त्यानंतर गेल्या आठवड्यात कर्वेनगर येथील एका व्यवसायिकाच्या बंद फ्लॅटमध्ये एक कोटी ११ लाख रुपये चोरून नेले. या घटनेत देखील सुरक्षारक्षक, त्याची पत्नी व पूर्वीच्या सुरक्षारक्षकाचा सहभाग आहे. मार्केटयार्ड येथे व्यवसायिक शहा यांच्या बंगल्यात तीन आठवड्यांपूर्वी नेमलेल्या सुरक्षारक्षाने ५२ लाखांची घरफोडी केल्याचा प्रकार समोर आला आहे. या सर्व घटनांमधील आरोपी असलेल्या सुरक्षारक्षकांची काहीच माहिती मालकांकडे नसल्याचे आढळून आले आहे. सुरक्षारक्षक अथवा नोकर ठेवताना त्यांची सर्व माहिती घ्यावी, अशा सूचना पोलिसांकडून वारंवार केल्या जात आहेत. पण, त्याकडे नागरिका दुर्लक्ष करत असल्यामुळे कोट्यवधींची मालमत्ता सुरक्षारक्षकांनी लंपास केली आहे.
गुन्हे शाखेचे पोलिस उपायुक्त शिरीष सरदेशपांडे यासंदर्भात म्हणाले की, ‘मालक घरी नसताना घर फोडून लाखोंचा ऐवज घरफोडी करून नेल्याच्या दिवाळीपासून चार घटना घडल्या आहेत. या चार ही घटनांमध्ये मालकांकडे सुरक्षारक्षकांची काहीही माहिती नव्हती. आपली आमूल्य संपत्ती या अनोळखी सुरक्षारक्षकांच्या हवाली करून मालक बाहेरगावी गेले होते. अलिकडे तर अशा घटना वाढत आहेत. त्यामुळे नागरिकांनी सुरक्षारक्षक ठेवताना आवश्यक ती काळजी घ्यावी.’
पोलिस पडताळणी गरजेची
नागरिकांनी सुरक्षारक्षक किंवा नोकर ठेवताना त्याचे पूर्ण नाव, पत्ता, नातेवाइक, तो पूर्वी काम करत असलेल्या ठिकाणाची माहिती घेऊन ठेवावी. तसेच, त्याची स्थानिक पोलिसांकडून पोलिस पडताळणी करून घ्यावी. पडताळणी करण्यासाठी आलेल्या नागरिकांना पोलिसांकडून मदत केली जाईल. तुमचा कितीही विश्वासातील नोकर किंवा सुरक्षारक्षक असेल, तरी त्याची पडताळणी करा. कारण, तो गुन्हेगारी प्रवृत्तीच्या लोकांच्या संपर्कात आल्यानंतर त्याचे विचार बदलू शकतात. त्यामुळे पोलिस पडताळणी न केलेल्यांची देखील पडताळणी करून घ्यावी, असे आवाहन गुन्हे शाखेचे उपायुक्त शिरीष सरदेशपांडे यांनी केले आहे.
ही काळजी घ्या…
– सुरक्षारक्षक किंवा नोकर ठेवताना त्याचे संपूर्ण नाव, गाव, वय, पत्ता व संपर्क क्रमांक घेऊन ठेवा.
– सुरक्षारक्षकाचे राहण्याचे मूळ ठिकाण आणि त्याच्या कुटुंबीयांची माहिती घ्यावी.
– सुरक्षारक्षकास परिसरातील ओळखणाऱ्या दोघांची नावे, पत्ता व दूरध्वनी क्रमांक घ्या.
– सुरक्षारक्षकाचा पासपोर्ट फोटो व शक्य झाल्यास त्याच्या बोटाचे ठसे घेऊन ठेवा.
– सुरक्षारक्षकाची पोलिस पडताळणी करून घ्यावी.