बेस्ट कर्मचाऱ्यांनी मंगळवारपासून सुरू झालेल्या संपातून शुक्रवारी तोडगा निघण्याची शक्यता अखेरीस फोल ठरली. सकाळपासून सुरू असलेल्या बैठका, मुंबई उच्च न्यायालयात दाखल झालेली याचिका, महापौर दालनातील चर्चा आदींमुळे कर्मचाऱ्यांच्या मागण्यांना न्याय मिळण्याची आशा होती. पण, बैठकांमधील चर्चा अयशस्वी ठरल्याने सायंकाळी उशिरा परळमध्ये झालेल्या कर्मचाऱ्यांच्या मेळाव्यात संप मागे न घेण्याची घोषणा करण्यात आली. गेल्या चार दिवसांपासून सुमारे ३० हजार कर्मचाऱ्यांनी एकदिलाने संप यशस्वी केला. आज, शनिवारीही संप सुरू ठेवणार असल्याचे जाहीर केल्याने मुंबईकरांना पुन्हा वाहतुकीसाठी अन्य पर्याय स्वीकारावे लागतील.
संपाची तीव्रता वाढू नये म्हणून उच्च न्यायालयाने लवकर तोडगा काढण्याचे आदेश राज्य सरकारला दिले. शनिवारी सकाळी उच्चस्तरीय बैठक होणार असून तोडग्याचे प्रयत्न केले जातील. दरम्यान, कर्मचारी आणि मुंबईकरांची सहनशीलता पणाला लागली आहे. शुक्रवारी सर्व बैठका, चर्चा अयशस्वी ठरल्याने त्याचे पडसाद राजकीय स्तरावरही उमटू लागले. राज्य सरकार, महापालिकेने कर्मचाऱ्यांनी संप मागे घेण्यासाठी आर्जवे केली. मात्र, लेखी स्वरूपात मागणी मान्य केल्याशिवाय तोडगा स्वीकारण्यास कर्मचारी आणि बेस्ट कृती समितीने स्पष्ट शब्दांत नकार दिला आहे.
मेळाव्यात एकतेची वज्रमूठ
संपावर तोडगा निघत नसल्याने शुक्रवारी सायंकाळी परळ येथील शिरोडकर सभागृहात झालेल्या कामगार मेळाव्यास प्रचंड गर्दी झाली होती. कर्मचाऱ्यांनी प्रचंड घोषणाबाजी करुन प्रशासनाविरोधातील वज्रमूठ घट्टपणे उभारली. कोणत्याही स्थितीत माघार घेणार नसल्याच्या निर्धाराने शेकडो कर्मचारी मेळाव्यात जमले होते. पक्षीय झूल मागे ठेवून संपकरी कर्मचाऱ्यांनी मागण्या मान्य होईपर्यंत संप सुरू ठेवण्याचा एकमुखी एल्गार केला.
आज उच्चस्तरीय बैठक
उच्च न्यायालयात राज्य सरकारने त्रिसदस्यीय समिती नेमण्यात आल्याची माहिती देण्यात आली. या समितीमध्ये मुख्य सचिव, परिवहन विभागाचे आयुक्त आणि नगरविकास खात्याच्या सचिवांचा समावेश आहे. शनिवारी सकाळी ही बैठक होणार असून त्यात संपाबाबत मार्ग निघण्याची शक्यता आहे.
मुंबईकर हैराण
तिथे मंगळवारपासून संपावर गेलेल्या बेस्ट कर्मचाऱ्यांनी बेमुदत संपाने मुंबईकरांची अडचण चौथ्या दिवशीही कायम होती. बेस्ट बसअभावी रिक्षा, टॅक्सी, ओला-उबरची सेवा मिळणेही कठीण झाल्याचे दृश्य संपूर्ण मुंबईत होते. या सेवांसाठी नेहमीपेक्षा जास्त दर मोजावे लागत असल्याने मुंबईकरांमध्ये कमालीची नाराजी पसरली आहे.
बैठका आणि चर्चा निष्फळ
संपावर तोडगा काढण्यासाठी मॅरेथॉन बैठकांचे सत्र सुरू असले तरीही त्यातून संपावर तोडगा निघालेला नाही. गुरुवारी महापौर बंगल्यावर शिवसेना पक्षप्रमुख उद्धव ठाकरे, महापौर विश्वनाथ महाडेश्वर आदींच्या उपस्थितीत बैठक झाली. पण तिथेही कृती समितीने भूमिका ठाम ठेवत संप मागे घेण्यास नकार दिला.
समिती बैठक तहकूब
शुक्रवारी बेस्ट समितीच्या बैठकीत केवळ तीन सदस्य उपस्थित राहिल्याने बेस्ट समिती अध्यक्ष आशीष चेंबूरकर यांनी बैठक तहकूब केली. या बैठकीस किमान सात सदस्य उपस्थित असणे आवश्यक आहे. ही गणसंख्या न जमल्यास बैठक तहकूब केली जाते. त्यात मुंबई पालिकेतील विरोधी पक्षनेते रवी राजा, भाजपचे सदस्य सुनील गणाचार्य, श्रीकांत कवठणकर यांचा समावेश होता.