मुंबईतील हिरानंदानी रुग्णालयात उघडकीस आलेल्या किडनी रॅकेटमधील साक्षीदार सुंदर सिंग (२६) याने दिव्यातील आपल्या राहत्या घरी गळफास घेऊन आत्महत्या केल्याने खळबळ उडाली आहे. आगासन रोड परिसरात भाड्याच्या घरात राहणाऱ्या सुंदरची वडापावची गाडी आहे. पत्नीसोबत भांडण झाल्याने ३ जानेवारी रोजी पत्नी त्याला सोडून निघून गेली होती. घरी एकटाच असलेल्या सुंदरने नायलॉनच्या दोरीने गळफास घेऊन आत्महत्या केली. मंगळवारी दुपारी हा प्रकार समोर आल्यानंतर घटनास्थळी पोलिस दाखल झाले. आत्महत्येची नोंद मुंब्रा पोलिस ठाण्यात करण्यात आली आहे.
ही केवळ आत्महत्या असल्याचे वरिष्ठ पोलिस निरीक्षक किशोर पासलकर यांनी सांगितले. सुंदर सिंग हा मुंबईतील हिरानंदानी रुग्णालयातील किडनी रॅकेटमधील साक्षीदार होता, असेही पासलकर म्हणाले. पवई येथील हिरानंदानी रुग्णालयातील किडनी रॅकेट २०१६ मध्ये उघड झाले होते.