लग्न करण्याचा सल्ला दिला म्हणून चिडलेल्या तरुणाने मित्राच्या आईच्या डोक्यात कुऱ्हाड घालून खून करण्याचा प्रयत्न केला. मारहाणीत संबंधित महिला गंभीर जखमी असून, तिच्यावर रुग्णालयात उपचार सुरू आहेत. पोलिसांनी आरोपीला काही तासातच अटक केली.
रमा सदाशिव धावनपल्ली (रा. यशवंत नगर, खराडी) असे जखमी महिलेचे नाव आहे. अतुल रासकर (वय ३०, रा. वृंदावन सोसायटी, खराडी) याला अटक केली आहे. सदाशिव धावनपल्ली (वय ५४) यांनी या प्रकरणी चंदननगर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, अतुल हा फिर्यादींच्या मुलाचा मित्र आहे. काही दिवसांपूर्वी धावनपल्ली दाम्पत्याने त्याला ‘तू लग्न का करत नाहीस, लग्न कर,’ असा सल्ला दिला होता. याचा राग अतुलच्या मनात राग होता. रमा सोमवारी घरी एकट्याच असताना अतुल पाणी पिण्याच्या बहाण्याने घरात शिरला. त्या पाणी आणण्यासाठी किचनमध्ये गेल्या असता, अतुलने पाठीमागून कुऱ्हाडीने डोक्यात वार केला. डोक्यात कुऱ्हाडीचा घाव वर्मी बसल्याने रमा रक्ताच्या थारोळ्यात पडल्या. त्यानंतर आरोपी पळून गेला. घटनेची माहिती मिळताच वरिष्ठ पोलिस निरीक्षक राजेंद्र मुळीक यांनी घटनास्थळी धाव घेतली.