‘कुष्ठरोग हे घटस्फोटासाठी कारण ठरू शकत नाही,’ असे सांगणारे विधेयक लोकसभेत सोमवारी मंजूर झाले. ‘कुष्ठरोग हा पूर्वी बरा न होणारा रोग मानला जात होता; परंतु तो आता बरा होणारा रोग आहे. त्यामुळे ते घटस्फोटाचे कारण ठरू शकत नाही,’ असे विधी राज्यमंत्री पी. पी. चौधरी यांनी लोकसभेत सांगितले. त्यांनी ‘वैयक्तिक कायदा (दुरुस्ती) विधेयक, २०१८’ वर सुरू असलेल्या चर्चेला उत्तर दिले. हिंदू विवाह कायदा, मुस्लिम विवाह विच्छेद कायदा, घटस्फोट कायदा (ख्रिश्चन), विशेष विवाह कायदा आणि हिंदू दत्तक आणि पोटगी कायदा या पाच कायद्यांमध्ये कुष्ठरोग हा घटस्फोटाला आधार ठरू नये, अशी दुरुस्ती या विधेयकात सुचविली आहे. दरम्यान, काँग्रेस आणि समाजवादी पक्षाचे सदस्य राफेलच्या मुद्द्यावरून लोकसभेत गोंधळ घालत असतानाच कुष्ठरोगविषयक विधेयक आवाजी मतांनी मंजूर करण्यात आले. कुष्ठरोग हा घटस्फोटासाठी कारण असणे, हा भेदभाव करणारी तरतूद आहे. हा भेद दूर करण्याची आवश्यकता मानवी हक्क आयोगाने आणि विविध न्यायालयांनी व्यक्त केली आहे, अशी माहिती पी. पी. चौधरी यांनी लोकसभेत दिली.
दरम्यान, कुष्ठरोगाचे अद्याप देशातून उच्चाटन झालेले नाही, असे सांगून ‘एआयएमआयएम’चे नेते असदुद्दीन ओवैसी यांनी या विधेयकाला विरोध केला. ‘मुस्लिम वैयक्तिक कायद्यात हस्तक्षेप करू नका,’ असे सांगून पाकिस्तान आणि बांगलादेशासारख्या देशांमध्येही कुष्ठरोगाच्या आधारे घटस्फोट मिळतो, याकडे त्यांनी लक्ष वेधले. हे विधेयक गेल्या वर्षीच्या ऑगस्ट महिन्यात सादर करण्यात आले होते.