‘काळ आला होता पण वेळ आली नव्हती’ याचा प्रत्यय बुधवारी सकाळी ८ वाजता नांदुरा रेल्वे स्थानकावर आला. रेल्वे रुळावर पडल्यानंतर मालगाडीचे चाळीस डबे अंगावरून गेल्यावरही ‘तो’ सुखरुप बचावला. सोशल मीडियावर सध्या ‘देव तारी त्याला कोण मारी’ या उक्तीचा हा व्हीडिओ व्हायरल झाला आहे.
नेहमीप्रमाणे बुधवारी सकाळी नांदुरा रेल्वेस्थानकावर ये-जा करण्यासाठी नागरिकांची गर्दी होती. प्रवासी गाडी पास झाल्यानंतर अचानक एक जण दादऱ्याचा वापर न करता थेट रेल्वे रुळावर उतरला. काही कळायच्या आतच रुळ ओलांडताना तो रुळावर खाली पडला. आणि याच क्षणी भुसावळकडे जाणाऱ्या मालगाडीच्या खाली तो आला. रेल्वे स्थानकावर उपस्थितांच्या लक्षात ही घटना येताच काही जण ओरडले. तर काहींनी चक्क डोळे बंद करून श्वास थांबविला होता. एक, दोन नव्हे तर ४० डबे असलेली ही मालगाडी त्याच्या अंगावरून काही सेंकदाच्या फरकात निघून गेली. या घटनेत तो सुखरुप बचावला. त्याच्या देहाचे तुकडे पडले असतील या भीतीने डोळे बंद केलेल्या अनेकांच्या जीवात जीव आला. तत्काळ उपस्थित तरुणांनी त्याला उचलून प्लॅटफार्मवर आणले. रेल्वेखाली आलेला हा व्यक्ती मनोरुग्ण असल्याची माहिती आहे. अधिक तपास रेल्वे पोलिस करीत आहेत.